وزیراعظم آج فیصلہ کریں، کراچی ہم خود کھلوالیں گے، خالد مقبول صدیقی کا اعلان

کراچی: ایم کیوایم پاکستان کے کنوئینر ڈاکٹر خالد مقبول صدیقی نے کہا ہے کہ کچھ علاقوں میں تو لاک ڈاؤن میں سختی ہے اور کچھ میں سب کاروبار کھلا ہے، وزیراعظم آج فیصلہ کریں کہ کراچی کھول دیا جائے ہم خود شہرکھلوا لیں گے۔

کراچی کے تاجروں کے ساتھ  بہادرآباد میں پریس کانفرنس کرتے ہوئے ڈاکٹر خالد مقبول صدیقی نے کہا کہ آج ایک بار پھر اس ڈوبتے ہوئے کراچی کیلئے تاجروں کے ساتھ بیٹھے ہیں،کراچی میں کب کاروبار کھلنا ہے وہ کراچی کے منتخب نمائندوں کو کرنا ہے دادو کے نمائندوں کو نہیں کرنا،کراچی کا کاروبار چلتا ہے تو پاکستان چلتا ہے۔

انہوں نے کہا کہ کراچی کے تاجروں جو بھی فیصلہ کریں گے ہم انکے ساتھ کھڑے ہونگے،دنیا بھر میں کورونا کی جو نئی لہر آئی ہے اس پر ہم سب کو تشویش ہے،وفاق اور صوبہ کراچی اور حیدرآباد کو آفت زدہ قرار دے،آپ کراچی سے پچھلے 50 سالوں میں جتنی قربانی چاہتے تھے ہم دے چکے،اب قربانی دینے کی باری آپکی ہے۔

خالد مقبول صدیقی نے کہا کہ تھوڑی دیر دکان کھلنے سے زیادہ رش ہوگا یا 24 گھنٹے کھلنے سے ہوگا، لوگوں کو بڑی بے شرمی سے کہا گیا کہ آپ ویکسین کروائیں وارنہ پولیس آپ سے پیسے لیگی، کراچی کے فیصلے کرنے کا حق کراچی کے مقامی افسروں کے سپرد کیا جائے ،فیصلہ کیا جائے کہ اس وباء کے موقع پر جو رشوت لے گا اسے معطل کرکے برطرف کیا جائے۔

مزید پڑھیں:ایک دن میں دس لاکھ ویکسین لگانے کا ہدف حاصل کرلیا،اسد عمر

وفاق کہتا ہے کہ لاک ڈاؤن قومی مفاد میں نہیں ہے جبکہ صوبہ لاک ڈاؤن کو حل سمجھتا ہے،وبا ء کے موقع پر دکانداروں کو ریلیف دینے کہ بجائے انہیں جرمانے اور بند کروایا جارہا ہے،اب ایسا نہیں چلے گا اور ایسا نہ ہوکہ لوگ معاملات اپنے ہاتھ میں لے لیں،لوگ 12 گھنٹے لائن میں لگ رہے ہیں اور انہیں پھر بھی ویکسین نہیں لگ رہی۔

اگر 30 فیصد لوگوں کو کراچی میں کورونا ہے تو پھر لوگوں کو ویکسی نیشن کیلئے ہنگامی اقدامات کئے جائیں،کراچی کہ تاجروں کا ٹیکس معاف کیا جائے ،کراچی کے تاجروں کو بلا سود قرضے فراہم کئے جائیں،تاجروں کے تمام یوٹیلیٹی بلز معاف کئے جائیں،کیا لاک ڈاؤن سلیکٹڈ ہوتا ہے کہ کچھ علاقوں میں تو لاک ڈاؤن میں سختی ہے اور کچھ میں سب کاروبار کھلا ہے۔

انہوں نے کہا کہ میں محب وطن اداروں سے اپیل کرتا ہوں کہ اس نسل پرست حکومت کے اقدامات کو دیکھیں،میں مطالبہ کرتا ہوں کہ مکمل لاک ڈاؤن کو ختم کیا جائے،کراچی کی ساڑھے تین کروڑ آبادی کیلئے پولیو کی طرز پر ہنگامی بنیادوں پر ویکسینیشن کی جائے۔

خالد مقبول صدیقی نے کہا کہ ہم وفاق سے بات کر کے کوشش کر رہے ہیں کہ ویکسی نیشن سینٹرزکی تعداد میں اضافہ کیا جائے۔ وزیراعظم صاحب آج فیصلہ کریں کہ کراچی کھول دیا جائے ہم کھلوالیں گے اگر وزیراعظم سمجھتے ہیں کہ لاک ڈاؤن مسئلے کا حل نہیں تو آپ فیصلہ کریں کراچی کے تاجر کاروبار کھول لیں گے،کیا گورنر راج کا آپشن آئین میں موجود نہیں ہے؟۔