گوگل نیوز پر ہمیں فالو کریںکوئٹہ: چیئرمین این ڈی ایم اے لیفٹیننٹ جنرل محمد افضل نے کہا ہے کہ عیدالاضحیٰ کے موقعے پر ایس او پیز کی پابندی کریں، یہ ہمیں کورونا سے نجات دلائے گی۔
قومی ڈیزاسٹر مینجمنٹ اتھارٹی (این ڈی ایم اے) کے چیئرمین جنرل افضل نے کہا کہ اگر قوم ایس او پیز پر عمل درآمد یقینی بنائے تو کوئی وجہ نہیں کہ ہم کورونا وائرس پر قابو نہ پاسکیں۔
قبل ازیں چیئرمین این ڈی ایم اے کوئٹہ پہنچ گئے جہاں انہوں نے مادرِ ملت فاطمہ جناح کے نام پر قائم چیسٹ اینڈ جنرل ہسپتال کے ساتھ ساتھ بولانا میڈیکل کمپلیکس کا معائنہ کیا۔
بعد ازاں میڈیا نمائندگان سے گفتگو کرتے ہوئے چیئرمین این ڈی ایم اے نے کہا کہ طبی عملہ اور ڈاکٹرز ہمارا ہراول دستہ ہیں۔ ہم ہسپتالوں میں کورونا وائرس کی روک تھام کیلئے اضافی بستر مہیا کریں گے۔ دیگر سہولیات بھی دی جائیں گی۔
چیئرمین این ڈی ایم اے نے کہا کہ ٹڈی دل کے حملے پر قابو پانے کیلئے قومی سطح پر آپریشن جاری ہے جس میں ہمارے 9 جہاز بھی شامل ہیں۔ تمام تر وسائل استعمال کرکے ٹڈی دل پر قابو پانا ہمارا اہم مقصد ہے۔
یہ بھی پڑھیں: این ڈی ایم اے نے شدید بارش اور سیلاب کا خدشہ ظاہر کردیا
