ایران کا راکٹ کے ذریعے سیٹلائٹ کو مدارمیں بھیجنے کا ایک اورتجربہ ناکام

تہران: ایران نے راکٹ کے ذریعے مقامی طور پر تیار کردہ ’ ظفر سیٹلائٹ‘ کو مدار میں بھیجنے کا تجربہ کیا جو رفتار کم ہونے کی وجہ سےایک بار پھر ناکام ہوگیا۔

عالمی خبر رساں ادارے کے مطابق ایران نے امام خمینی اسپیس پورٹ سے مقامی سطح پر تیار کردہ ’ظفر سٹیلائٹ‘ کو سیمورغ راکٹ کے ذریعے مدار پر بھیجنے کے لیے لانچ کیا ۔

ا تاہم مدار تک پہنچتے پہنچتے درکار رفتار کم ہوتی گئی جس کے باعث سیٹلائٹ ہدف تک نہیں پہنچ سکا، ایران کے سرکاری ٹی وی نے اطلاع دی کہ سمورگ ( فونیکس) راکٹ اپنی کم رفتار کی وجہ سے ظفر1 مواصلاتی سیّارے کو مدار میں بھیجنے میں ناکام رہا ہے۔

گزشتہ برس بھی ایران کی خلا میں سیٹلائٹس بھیجنے کی تین کوششیں ناکام ہو چکی ہیں، ایران نے 1979ءمیں برپاشدہ انقلاب کی سالگرہ تقریبات کے موقع پر اس سیارے کو خلا میں بھیجنے کی منصوبہ بندی کی تھی۔

وزارت دفاع کے ترجمان کے مطابق ایران نے بیلسٹک میزائلز اور ایک سٹیلائٹ کو مدار میں بھیجنے کا تجربہ کیا جس میں بیشتر اہداف اور مقاصد کو حاصل کرلیا گیا تاہم ’ظفر سٹیلائٹ‘ مدار تک پہنچنے میں ناکام رہا۔

یہ بھی پڑھیں: سمندری طوفان ”کیارہ“ برطانیہ کی آبادیوں میں داخل، بڑے پیمانے پر تباہی مچ گئی

اس سٹیلائٹ کو زلزلے اور قدرتی آفات کے مطالعے اور زراعت کی ترقی کے لیے مدد گار تصاویر اور ڈیٹا خلا سے زمین پر ایرانی سائنس دانوں اور محققین کو بھیجنا تھا، ظفر سٹیلائٹ تجربے سے امریکا اور ایران کے درمیان کشیدگی میں اضافہ ہونے کا امکان ہے۔

امریکا نے ’پیغام سٹیلائٹ‘ کو مدار پر بھیجنے کو ایران کی اشتعال انگیزی اور اقوام متحدہ کی قرارداد کے منافی قرار دیتے ہوئے ایران کو سٹیلائٹ بھیجنے سے باز رہنے کی دھمکی بھی دی تھی۔