کراچی میں بے روزگار شخص نے غربت سے دلبرداشتہ ہو کر خودکشی کر لی

شہرِ قائد میں ایک بے روزگار شخص نے غربت سے دلبرداشتہ ہو کر خودکشی کر لی جس کے نتیجے میں مرنے والے  کے 4 بچے یتیم ہو گئے ہیں۔

کراچی کے علاقے ابراہیم حیدری میں رہنے والے ادھیڑ عمر شخص نے گزشتہ روز شدید معاشی مسائل سے تنگ آ کر خود سوزی کی جس سے اس کے جسم کا 65 فیصد حصہ جل گیا۔

غربت سے دلبرداشتہ 40 سالہ شخص نے خود پر مٹی کا تیل چھڑک کر آگ لگا لی تھی، جس کے بعد اس کی زندگی نہ بچائی جاسکی۔اسے  رُتھ فاؤ ہسپتال کے برنس سینٹر میں علاج کے لیے لایا گیا تھا، تاہم صبح کے وقت اس  کا انتقال ہوگیا۔ 

علاقہ پولیس کے مطابق خودکشی کرنے والا شخص ردی کاغذوں کے کام سے خاطرخواہ روزی حاصل نہ کرسکا جبکہ جل جانے کے بعد اس کا دیا گیا بیان بھی ریکارڈ پر موجود ہے۔

یاد رہے کہ اس سے قبل قومی ادارہ برائے صحت اطفال (این آئی سی ایچ) کراچی میں سرجیکل آئی سی یو کے انکیوبیٹر میں آتشزدگی سےزیر علاج ایک نومولود بچی جاں بحق ہوگئی۔

گزشتہ روز کراچی میں بچوں کے سب سے بڑے سرکاری اسپتال قومی ادارہ برائے صحت اطفال کے انتہائی نگہداشت وارڈ میں موجود انکیوبیٹر میں آگ بھڑک اٹھی جس کے باعث انکیوبیٹر میں موجود نومولود بچی جل کر جاں بحق ہوگئی۔

مزید پڑھیں:  انکیوبیٹر میں آتشزدگی سے نومولود بچی جاں بحق