گوگل نیوز پر ہمیں فالو کریںپاکستان ٹیلی کمیونیکیشن اتھارٹی نے موبائل فون استعمال کرنے والے شہریوں کو ان کی سم کارڈز کے تحفظ اور قانونی استعمال سے متعلق سخت انتباہ جاری کیا ہے۔
فیس بک پر جاری کردہ ایک بیان میں پی ٹی اے نے تمام صارفین پر زور دیا کہ وہ اس بات کو یقینی بنائیں کہ ان کے زیرِ استعمال سم کارڈز صرف ان ہی کے نام پر رجسٹرڈ ہوں۔
اتھارٹی نے واضح کیا کہ کسی بھی سم کا استعمال کسی غیر متعلقہ یا اجنبی فرد کے ہاتھ میں نہیں ہونا چاہیے۔
پی ٹی اے کے مطابق، مجرمانہ عناصر چوری شدہ ذاتی معلومات کا استعمال کر کے دوسروں کے نام پر غیرقانونی طور پر سم حاصل کر رہے ہیں۔
ایسی سمیں مختلف فراڈ، سنگین جرائم، اور دہشت گردی جیسے اقدامات میں استعمال کی جا سکتی ہیں۔
پی ٹی اے نے یہ بھی ہدایت کی ہے کہ اگر کسی فرد کے نام پر ایسی کوئی سم رجسٹرڈ ہے جسے وہ خود استعمال نہیں کر رہا، تو اسے فوری طور پر بند کر دیا جائے تاکہ اس کے غلط استعمال سے بچا جا سکے۔
اتھارٹی نے آخر میں اس بات پر زور دیا کہ شفاف اور قانونی سم کے استعمال کو یقینی بنانے کے لیے عوام کا تعاون انتہائی ضروری ہے۔
بیان میں کہا گیا کہ یہی عمل اس بات کی ضمانت دے سکتا ہے کہ موبائل سروسز سے صرف درست اور مجاز افراد ہی فائدہ اٹھائیں اور قومی سلامتی کو کوئی خطرہ لاحق نہ ہو۔
