گوگل نیوز پر ہمیں فالو کریںپاکستان ریلوے نے عید الاضحی 2025 کے موقع پر پانچ خصوصی ٹرینیں چلانے کا اعلان کر دیا ہے، اس فیصلے کا مقصد عید کے مصروف ایام میں عوام کو ہجوم سے بچاتے ہوئے محفوظ اور آسان سفر فراہم کرنا ہے۔یہ خصوصی ٹرینیں 2 جون سے 4 جون تک مختلف شہروں کے درمیان چلائی جائیں گی۔
پہلی خصوصی ٹرین 2 جون کو دوپہر 1 بجے کراچی کینٹ سے لاہور کے لیے روانہ ہو گی۔
دوسری خصوصی ٹرین 3 جون کو صبح 10 بجے کوئٹہ سے پشاور کینٹ کے لیے روانہ ہو گی۔
اسی دن یعنی 3 جون کو شام 5 بجے لاہور سے کراچی کینٹ کے لیے ایک اور خصوصی ٹرین روانہ کی جائے گی۔
اسی شام 3 جون کو رات 8 بجے کراچی سٹی اسٹیشن سے راولپنڈی کے لیے ایک اور خصوصی ٹرین چلائی جائے گی۔
پانچویں اور آخری خصوصی ٹرین 4 جون کو رات 8 بجے کراچی کینٹ سے لاہور کے لیے روانہ ہو گی۔
پاکستان ریلوے کے مطابق ان خصوصی ٹرینوں میں سے بعض نئی تیار شدہ کوچز پر مشتمل ہوں گی جو ورکشاپس سے تیار کی گئی ہیں جبکہ دیگر موجودہ عید اسپیشل ٹرین سیٹ پر مشتمل ہوں گی۔
ان اقدامات کا مقصد عید الاضحی کے دوران مسافروں کے لیے سفر کو زیادہ محفوظ، آسان اور قابلِ اعتماد بنانا ہے۔
مزید برآں وزیر برائے ریلوے محمد حنیف عباسی نے ریلوے اسٹیشنز کو جدید، عوام دوست اور قابلِ رسائی سہولیات میں تبدیل کرنے کے لیے متعدد نئے اقدامات کا اعلان کیا ہے۔
وزیر ریلوے کے مطابق مختلف ریلوے اسٹیشنز پر جدید طرز کے ریستوران تعمیر کیے جائیں گے، جنہیں نجی اور پیشہ ورانہ انتظامیہ کے حوالے کیا جائے گا تاکہ معیاری سروسز فراہم کی جا سکیں۔
انہوں نے کہا کہ “شہری کسی بھی وقت ان سہولیات سے استفادہ کر سکیں گے اور خوشگوار ماحول میں قیام کر سکیں گے۔”
