گوگل نیوز پر ہمیں فالو کریںبالی ووڈ اسٹار سونم کپور ایک تقریب میں ریمپ پر واک کرتے ہوئے رو پڑیں۔
گروگرام میں ایک تقریب کے دوران آنجہانی فیشن ڈیزائنر روہت بال کو خراج عقیدت پیش کرتے ہوئے سونم کپور جذباتی ہو گئیں۔ سونم کے آنسوؤں کے ساتھ ریمپ پر واک کرنے کی کئی ویڈیوز سوشل میڈیا پر منظر عام پر آئیں۔ روہت بال کا انتقال گزشتہ سال نومبر میں 63 سال کی عمر میں ہوا تھا۔
کئی ویڈیوز میں، سونم کوبلینڈرز پرائڈ فیشن ٹور 2025 میں ریمپ پر واک کرتے ہوئے روتے ہوئے دیکھا گیا۔ انہوں نے اس موقع پر ہاتھ جوڑ کر اور بظاہر جذباتی ہو کر ناظرین کی طرف ہاتھ ہلایا۔
اس تقریب کے لیے سونم نے ہاتھی دانت کی بھاری بھرکم جیکٹ کے نیچے ایک لمبا سفید گاؤن پہنا تھا، جس میں بندھے ہوئے بالوں اور سرخ پھولوں کے ساتھ اسٹائل کیا گیا تھا۔ تقریب میں اے این آئی سے بات کرتے ہوئے سونم نے شو کا حصہ بننے پر اپنی خوشی کا اظہار کیا۔
ان کا کہنا تھا کہ ’میں گڈا (روہت بال) کے لیے یہاں آ کر بہت خوش ہوں۔ مجھے کئی بار ان کے کپڑے پہننے کا اعزاز حاصل ہوا ہے اور انہوں نے کئی بار میرے لیے کپڑے بھی ڈیزائن کیے۔‘
سونم نے انسٹاگرام پر کئی تصاویر اور ویڈیوز پوسٹ کرتے ہوئے لکھا کہ ’روہت بال کو خراج تحسین پیش کرتے ہوئے واک کرنا ایک اعزاز ہے۔’
