وزیراعظم کی زیرصدارت وفاقی کابینہ کے اجلاس میں نیب ترمیمی آرڈیننس کاجائزہ

اسلام آباد: وزیراعظم عمران خان کی زیرصدارت وفاقی کابینہ کے اجلاس ہوا جس میں نیب ترمیمی آرڈیننس پر اپوزیشن کے ردعمل کا بھی جائزہ لیاگیا جبکہ اے این ایف کے قانونی معاملات پر بھی غور کیا گیا۔

وزیراعظم کے زیر صدارت ہونے والے وفاقی کابینہ اجلاس میں 9 نکاتی ایجنڈے پر غور کیا گیاجبکہ ملک کی معاشی اور سیاسی صورتحال پر غور کیا گیا۔ معاشی ٹیم نے کابینہ کو معاشی اعشاریوں پر بریفنگ دی۔

کابینہ نے نیب ترمیمی آرڈیننس پر اپوزیشن کے ردعمل کا بھی جائزہ لیا،جبکہ اے این ایف کے قانونی معاملات پر بھی غور کیا گیا اس کے علاوہ اسٹیٹ بینک کی اسٹیٹمنٹ برائے مالی سال 2018کے اجراء اور اسمال اینڈ میڈیم انٹرپرائزر کے سی ای او کی منظوری بھی دی گئی۔

کابینہ اجلاس میں نیشنل کالج آف آرٹس انسٹی ٹیوٹ کے بل کا معاملہ موخر کر دیا گیا جبکہ آئل اینڈ گیس ڈیویلپمنٹ کمپنی سی ای او کی منظوری دی گئی۔

یہ بھی پڑھیں: حکومتی کامیابیوں کی تشہیر کے لیے وفاقی وزراء پر مشتمل اسٹریٹجی کمیٹی تشکیل

اجلاس میں ناروے کے شہری کی پاکستان سے ناروے کو حوالگی کا معاملہ بھی زیر غور آیا اور وزارت داخلہ کی جانب سے سہیل احمد کو برطانیہ کے حوالے کرنے کی درخواست پر بھی غور کیا گیا۔

اس موقع پر وزیراعظم عمران خان نے کہا کہ جو بھی کرپشن میں براہ راست یا بالواسطہ ملوث ہوگا وہ بچ نہیں سکتا، بزنس کمیونٹی اور ٹیکس سے متعلق معاملات ایف بی آر کی ذمہ داری ہے۔

کابینہ نے مقبوضہ کشمیر کی صورتحال کا بھی جائزہ لیا اور بھارتی فوج کے مظالم کی شدید مذمت کی۔ وزیراعظم نے کہا کہ مقبوضہ کشمیر میں بھارتی لاک ڈاون کو 148 دن گزر گئے اور بھارتی جارحیت مسلسل جاری ہے۔