مریم نواز کی گلے کے کینسر کی افواہوں کی تردید، حقیقت کچھ اور ہی نکلی

وزیر اعلیٰ پنجاب مریم نواز نے اپنی صحت کے حوالے سے حالیہ میڈیا رپورٹس پر وضاحت دی ہے کہ انہیں گلے کا کینسر نہیں ہے بلکہ ان کی بیماری پیراتھائیرائیڈ گلینڈ سے متعلق ہے۔

لندن میں پاکستان مسلم لیگ (ن) کے ایک پروگرام میں اپنے والدسابق وزیراعظم نواز شریف کے ساتھ بات کرتے ہوئے مریم نواز نے بتایا کہ وہ طبی معائنے کے لیے جنیوا میں تھیں تاہم انہیں کینسر نہیں ہے اور وہ دو دن میں پاکستان واپس آنے کا ارادہ رکھتی ہیں۔

انہوں نے کہاکہ “میں گزشتہ آٹھ ماہ سے بغیر کسی وقفے کے کام کر رہی ہوں۔ مجھے پیراتھائیرائیڈ کا مسئلہ ہے، جس کا علاج صرف سوئٹزرلینڈ یا امریکا میں ممکن ہے۔ میں جنیوا میں معائنے کے لیے تھی،” اور گلے کے کینسر کی افواہوں کو مسترد کر دیا۔

مریم نواز نے مزید کہا کہ انہوں نے ابتدا میں اپنی صحت کے بارے میں عوامی سطح پر بات نہیں کی لیکن حالیہ قیاس آرائیوں نے انہیں وضاحت کرنے پر مجبور کیا۔ انہوں نے اپنے حمایتیوں کو جلد پاکستان واپسی کی یقین دہانی کرائی۔

عمران خان نے 24 نومبر کو اسلام آباد میں احتجاج کی فائنل کال دے دی

اسی تقریب میں نواز شریف نے اپنے بھائی وزیر اعظم شہباز شریف اور مریم نواز کی کاوشوں کو سراہا اور پاکستان کے مستقبل کے حوالے سے امید کا اظہار کیا۔

مریم نواز نے پاکستان کی حالیہ معاشی ترقی پر بھی روشنی ڈالی، جس میں اسٹاک مارکیٹ میں ریکارڈ بلندی اور قومی ذخائر میں اضافے کا ذکر کیا۔ انہوں نے مزید کہا، “دنیا پاکستان کو دیکھ رہی ہے اور یہاں سرمایہ کاری کرنا چاہتی ہے۔ ہر نیا دن خوشحالی کی امید لاتا ہے۔”