گوگل نیوز پر ہمیں فالو کریںاسلام آباد: حکومت نے جڑانوالہ میں مسیحی برادری کے خلاف اگست میں ہجوم کے حملے کے دوران تباہ ہونے والے 20 گرجا گھروں کی مرمت اور متاثرہ خاندانوں کو 20 لاکھ روپے تقسیم کیے ہیں۔
16 اگست کو جڑانوالہ میں ایک افسوسناک واقعہ پیش آیا تھا جب دو مسیحیوں پر قرآن پاک کی بے حرمتی کا الزام لگایا گیا جس کے نتیجے میں گرجا گھروں کو آگ لگادی گئی تھی۔
گزشتہ روز غیر ملکی میڈیا کے صحافیوں کے ایک گروپ نے ہجوم کے تشدد کے دوران جلائے جانے کے بعد بحالی کے کام کو دیکھنے کے لئے جمعرات کو جڑانوالہ میں گرجا گھروں کا دورہ کیا ۔
فیصل آباد کے ڈپٹی کمشنر عبداللہ نیئر شیخ نے کہا کپ مجموعی طور پر، تقریباً 22 گرجا گھر متاثر ہوئے اور حکومت نے ان سب کو بحال کرنے کے لیے 124 ملین روپے خرچ کیے ہیں۔
فیصل آباد کے سٹی پولیس آفیسر (سی پی او)، کیپٹن (ریٹائرڈ) محمد علی ضیاء نے بتایا کہ ایک سینئر اہلکار کی سربراہی میں ایک وقف ٹیم اس کیس کی تحقیقات کر رہی ہے، جس میں اب تک 300 سے زائد افراد کو گرفتار کیا جا چکا ہے۔
مزید برآں ڈپٹی کمشنر شیخ نے کہا کہ 80 خاندانوں کو معاوضہ دیا گیا ہے۔ نگران وزیر اعظم انوار الحق کاکڑ نے بھی مسیحی برادری سے اظہار یکجہتی کے لیے 21 اگست کو جڑانوالہ کا دورہ کیا تھا اور کچھ متاثرہ گھرانوں میں چیک تقسیم کیے تھے۔
