پاکستان سنی تحریک کے زیر اہتمام سانحہ مستونگ اور ہنگو کے دہشتگردوں کی فوری گرفتاری کیلئے ملک بھر میں احتجاجی مظاہرے کئے گئے، جبکہ مرکز احتجاجی مظاہرہ کراچی پریس کلب پر ہوا، جس میں کارکنان نے یہودیوں کے ایجنٹو دہشتگردی ختم کرو کے نعرے لگائے۔

کراچی پریس کلب پر مرکزی احتجاجی مظاہرے سے خطاب کرتے ہوئے مرکزی رابطہ کمیٹی کے رکن فہیم الدین شیخ نے کہا کہ اہلسنت کے عید میلادالنبیؐ کے جلوس پر خودکش حملے حکمرانوں کیلئے سوالیہ نشان ہیں، ہمیں بتایا جائے سانحہ مستونگ و ہنگو عید میلادالنبیؐ کے شہداء کا خون کس کے ہاتھوں پر تلاش کریں۔

یہ بھی پڑھیں:

انہوں نے کہا کہ 60 سے زائد شہادتیں ہو چکی اور دہشتگردوں تک ابھی تک نہیں پہنچا جا سکا، بھارتی را و اسرائیلی موساد کے ایجنٹ دہشتگردی کرکے کہاں چلے جاتے ہیں، حکومت اور قانون نافذ کرنیوالے اداروں کی رٹ کہاں ہے۔
فہیم الدین شیخ نے کہا کہ ابھی تک سانحہ مستونگ کے اصل کرداروں کا گرفتار نہ ہونا سوالیہ نشان ہے، حکومت اور ملکی سلامتی کے ادارے سانحہ مستونگ و ہنگو کے اصل کرداروں کو گرفتار کرکے کیفر کردار تک پہنچائیں۔

انہوں نے کہا کہ سانحہ مستونگ اور ہنگو ملک کو فرقہ وارانہ فسادات میں دھکیلنے کی سازش ہے، عید میلادالنبیؐ کے جلوس پر حملہ فرقہ وارانہ دہشتگردی کو پروان چڑھانے کی ناکام کوشش ہے، دہشتگردوں کو بتانا چاہتے ہیں کہ دہشتگردی کے ذریعے ہمیں عید میلادالنبیؐ منانے سے نہیں روکا جا سکتا۔

انہوں نے کہا کہ دہشتگردوں کا حکومت اور پاک فوج کا ساتھ ملکر پوری قوت سے مقابلہ کرینگے، دہشتگردی کے خلاف ایک بار پھر پوری قوم کو متحد اور یکجا ہونے کی ضرورت ہے۔