گوگل نیوز پر ہمیں فالو کریںاسلام آباد: خصوصی سرمایہ کاری سہولت کونسل کی ایپکس کمیٹی کا پانچواں اجلاس آج اسلام آباد میں ہوا جس میں ملک کی معاشی بحالی کے لئے مجموعی کاروباری اور سرمایہ کاری کے ماحول کو بہتر بنانے کے واحد ایجنڈے پر خصوصی غور و خوض کیا گیا۔
ذرائع کے مطابق نگران وزیراعظم انوار الحق کاکڑ کے زیرصدارت اس اجلاس میں آرمی چیف، وفاقی کابینہ کے ارکان، صوبائی وزرائے اعلیٰ اور اعلیٰ حکومتی عہدیداروں نے شرکت کی۔
متعلقہ وزارتوں نے ملکی اور غیرملکی سرمایہ کاری لانے اور معاشی شرح نمو کی رفتار تیز کرنے کی راہ میں حائل بڑے اقتصادی چیلنجز بہتر طرز حکمرانی میں رکاوٹوں اور ریگولیٹری طریقہ کار کے نقائص پر قابو پانے کے لئے منصوبے اور لائحہ عمل پیش کیا۔
نگران وزیراعظم نے وزارتوں کو ہدایت کی کہ وہ عبوری حکومت کو دستیاب وقت کو بالائے طاق رکھ کر زیادہ سے زیادہ نتائج دینے کی کوشش کریں اور آئندہ حکومت کے لئے مضبوط بنیاد فراہم کریں۔
مزید پڑھیں:ملک میں سالانہ بنیاد پر مہنگائی 26.32 فیصد ہوگئی
کمیٹی نے مقررہ کردہ اہداف حاصل کرنے کے لئے قلیل، درمیانی اور طویل مدتی اقدامات پر تفصیلی تبادلہ خیال کیا۔ وزیراعظم نے اس حوالے سے عملی اقدامات کی منظوری دی اور ان پر جلد عملدرآمد کیا جائے گا۔
