گوگل نیوز پر ہمیں فالو کریںایشیا کپ کے آفیشل براڈکاسٹر سٹار اسپورٹس نے جمعہ کو آئندہ ٹورنامنٹ کے لیے 19 رکنی کمنٹیٹرز کے پینل کا اعلان کیا۔
19 رکنی کمنٹیٹرز میں میزبان پاکستان کے چار اور بھارت کے دس سابق کرکٹرز شامل تھے۔
تاہم پاکستان کرکٹ کے لیجنڈ کپتان اور کمنٹیٹر رمیز راجہ کو آئندہ سیریز کے لیے کمنٹیٹرز کے پینل میں شامل نہیں کیا گیا۔
پاکستان کی جانب سے کمنٹری پینل میں بازید خان، عامر سہیل، وسیم اکرم اور وقار یونس شامل ہیں جبکہ روی شاستری، اینڈی فلاور اور میتھیو ہیڈن سمیت دیگر نمایاں نام ہیں جو ایشیا کپ کے دوران کمنٹری کریں گے۔
واضح رہے کہ ایشین کرکٹ کونسل نے ابھی تک کمنٹیٹرز کے نام اپنی ویب سائٹ پر شائع نہیں کیے ہیں۔
رمیز راجہ ستمبر 2021 سے کمنٹری باکس سے دور تھے، کیونکہ وہ تین سال کی مدت کے لیے پاکستان کرکٹ بورڈ (پی سی بی) کے چیئرمین منتخب ہوئے تھے۔ وہ گزشتہ ماہ پاکستان اور سری لنکا کے درمیان ٹیسٹ سیریز کے دوران کمنٹیٹر کے طور پر واپس آئے تھے۔
رمیز راجہ کو پی سی بی کے دیگر ارکان کے ساتھ صرف ایک سال بعد عہدے سے ہٹا دیا گیا تھا اور ان کی جگہ نجم سیٹھی کی سربراہی میں 14 رکنی انتظامی کمیٹی تشکیل دی گئی۔
سابق کرکٹ لیجنڈ پاکستان کے 18ویں ٹیسٹ اور 12ویں ون ڈے کپتان تھے اور انہوں نے 255 بین الاقوامی میچوں میں حصہ لیا جس میں انہوں نے 1984 سے 1997 تک 8,674 رنز بنائے۔
