لاہور، ملت پارک میں مسلح شخص کی فائرنگ سے سابق ایس پی فرحت عباس شہید

لاہور کے علاقے ملت پارک میں مسلح شخص نے بلا اشتعال فائرنگ کی جس کے نتیجے میں سابق ایس پی فرحت عباس شہید  ہو گئے ہیں۔

تفصیلات کے مطابق ملت پارک میں فائرنگ کا افسوسناک واقعہ پیش آیا جہاں ہیلمٹ پہنے ہوئے مسلح ملزم کی فائرنگ کے نتیجے میں سابق ایس پی فرحت عباس شہید ہوئے۔ پولیس نے واقعے کی تفتیش شروع کردی۔

یہ بھی پڑھیں:

پشاور میں دہشت گردوں کی فائرنگ سے سکھ دکاندار قتل

پنجاب پولیس کا کہنا ہے کہ فرحت عباس پر فائرنگ ان کے گھر کے قریب ہوئی۔ حملہ آور موٹر سائیکل پر سوار تھا جس نے ہیلمٹ پہن رکھا تھا۔ سی سی پی او لاہور نے واقعے کا نوٹس لے کر قاتل کو گرفتار کرنے کا حکم دے دیا۔

واقعے کی سی سی ٹی وی فوٹیج بھی سامنے آگئی۔ سابق ایس پی فرحت عباس گاڑی کے قریب موجود تھے جب انہیں فائرنگ کا نشانہ بنایا گیا۔ سی سی ٹی وی فوٹیج میں فائرنگ کرتے ہوئے حملہ آور کو دیکھا جاسکتا ہے۔

خیال رہے کہ اس سے قبل پشاور میں تھانہ رحمان بابا کی حدود دیر کالونی روڈ پر سکھ پنساری کو نامعلوم موٹر سائیکل سواروں نے فائرنگ کرکے دوکان کے اندر قتل کر دیا۔

 مسلح حملہ آوروں کی فائرنگ سے گزشتہ ماہ قتل ہونے والے دیال سنگھ پشاور کے محلہ جوگن شاہ کے رہائشی تھے، ہر روز ڈبگری سے کوہاٹ روڈ پر اپنی پنساری کی دکان پر جاتے تھے۔