گوگل نیوز پر ہمیں فالو کریںراولپنڈی: وزیر اطلاعات و نشریات مریم اورنگزیب نے پی ٹی آئی چیئرمین عمران خان کو ’سیاسی دہشت گرد‘ قرار دیتے ہوئے کہا کہ وہ ملک کی تنزلی کی علامت ہیں۔
مسلم لیگ ن کے ورکرز کنونشن سے خطاب کرتے ہوئے وفاقی وزیر نے کہا کہ توشہ خانہ چور کی جانب سے مسلم لیگ ن کی قیادت پر لگائے گئے تمام الزامات غلط ثابت ہوئے۔
انہوں نے کہا کہ یہ ستم ظریفی ہے کہ ایک شخص جس نے اقتدار میں رہتے ہوئے ایک بھی ترقیاتی منصوبہ شروع نہیں کیا، ملک میں اربوں روپے کی سرمایہ کاری لانے والوں پر الزام لگا رہا ہے۔
وفاقی وزیر نے کہا کہ ڈیلی میل کی جانب سے وزیر اعظم شہباز شریف سے معافی مانگنا دراصل پاکستان کے 220 ملین عوام سے معافی ہے۔ انہوں نے مزید کہا کہ عمران خان نے شہباز شریف کی دشمنی میں ڈیوڈ روز کو وزیراعظم کے خلاف بے بنیاد خبر شائع کرنے کے لیے استعمال کیا۔
انہوں نے کہا کہ 2016 میں جب نواز شریف اقتدار پر فائز تھے تو پاکستان کی جی ڈی پی کی شرح نمو 6.2 فیصد تھی جب کہ مہنگائی صرف 2.3 فیصد تھی۔ انہوں نے مزید کہا کہ نواز شریف کے دور میں آئی ایم ایف پروگرام کو رول بیک کیا گیا، سی پیک کے منصوبے شروع کیے گئے، نوجوانوں کو روزگار کے مواقع فراہم کیے گئے اور 14 ہزار میگاواٹ بجلی نیشنل گرڈ میں شامل کی گئی۔
وفاقی وزیر نے کہا کہ اس وقت ایک سازشی، نا اہل اور توشہ خانہ چور امپائر کی انگلی کا انتظار کر رہا تھا اور دھرنا دے رہا تھا۔انہوں نے کہا کہ نواز شریف نے ملک کو ایٹمی قوت بنایا لیکن عمران خان نے ترقی کا عمل برباد کر دیا۔
انہوں نے کہا کہ نواز شریف نے اپنے دور حکومت میں دہشت گردی کی لعنت کا خاتمہ کیا لیکن جب عمران خان اقتدار میں آئے تو دہشت گردی نے پھر سر اٹھایا۔
مزید پڑھیں:عمران خان لندن میں تمام کیس ہار گئے، سلمان شہباز کی کڑی تنقید
عمران خان نے اپنے دور میں ملکی خزانے کو ”پرچون کی دکان“ بنا رکھا تھا جب کہ وزیراعظم شہباز شریف عوام کی بہتری کے لیے کوشاں ہیں۔انہوں نے وزیر اعظم شہباز شریف، وزیر داخلہ رانا ثناء اللہ اور وفاقی وزیر احسن اقبال کو عدالتی مقدمات میں کامیابی پر مبارکباد دی۔
