عدالت نے اسلام آباد لوکل گورنمنٹ آرڈیننس 2021 کالعدم قرار دے دیا

اسلام آباد ہائیکورٹ نے شہرِ اقتدار میں بلدیاتی الیکشن کیلئے منظور کیا گیا وفاقی حکومت کا لوکل گورنمنٹ آرڈیننس 2021 کالعدم قرار دے دیا ہے۔

تفصیلات کے مطابق لوکل گورنمنٹ کے متعلق فیصلہ اسلام آباد ہائیکورٹ کے سینئر جج جسٹس محسن اختر کیانی نے سنایا۔ عدالت نے حکومت کو لوکل گورنمنٹ ایکٹ کی بجائے نئے آرڈیننس کے تحت بلدیاتی انتخابات کے انعقاد سے روک دیا۔

یہ بھی پڑھیں:

لوکل گورنمنٹ آرڈیننس،اسلام آبادمیں اساتذہ سڑکوں پرآگئے

ہائیکورٹ میں فیصلہ پڑھ کر سناتے ہوئے جسٹس محسن اختر کیانی نے ریمارکس دئیے کہ اسلام آباد کے بلدیاتی انتخابات نئے آرڈیننس کے تحت نہیں ہوسکتے۔ الیکشن کمیشن کو لوکل گورنمنٹ ایکٹ 2015 کے تحت کام جاری رکھنا ہوگا۔

جسٹس محسن اختر کیانی نے اسلام آباد ہائیکورٹ میں قبل ازیں محفوظ کیا گیا فیصلہ پڑھ کر سنایا۔ واضح رہے کہ ہائیکورٹ نے اسلام آباد لوکل گورنمنٹ آرڈیننس 2021 کو کالعدم قرار دینے سے متعلق فیصلہ 8روز قبل محفوظ کیا تھا۔ 

خیال رہے کہ اس سے قبل لوکل گورنمنٹ آرڈیننس کےخلاف وفاقی تعلیمی اداروں کےاساتذہ نےڈی چوک پراحتجاج کیاجس کےباعث شاہراہ دستوربلاک ہوگئی اورشہریوں کومشکلات کاسامناکرناپڑا۔ احتجاج میں اساتذہ نےبڑی تعدادمیں شرکت کی۔

سرکاری اسکولوں کو میونسپل کارپوریشن کےتحت کرنے پردسمبر میں اساتذہ کےاحتجاج میں اساتذہ کوعزت دو کےنعرےبھی لگائےگئے،جس کےبعداساتذہ نےپارلیمنٹ ہاؤس کی طرف جانےکی کوشش کی۔پولیس نے مظاہرین کو خاردار تاریں ہٹانے سے روک دیا۔