حکومت آخرکار فنانس بل 2021 جسے منی بجٹ کہا جاتا ہے کو پارلیمنٹ کے ذریعے منظور کرنے میں کامیاب ہو گئی ہے جس سے اشیاء کی قیمتوں میں ممکنہ اضافے کے خدشات بڑھ گئے ہیں اور آئی ایم ایف کی جانب سے مالی امداد کے پروگرام کے حصے کے طور پر اگلی قسط جاری کرنے سے پہلے ایک رکاوٹ کو دور کیا۔
قومی اسمبلی کا گھنٹوں طویل اجلاس آدھی رات تک جاری رہا کیونکہ وزیراعظم اور اپوزیشن رہنماؤں کی موجودگی میں ایک ہی دن میں 16 بلوں کو منظور کیا گیا۔اسٹیٹ بینک آف پاکستان ترمیمی بل جس میں مرکزی بینک کے لیے زیادہ خود مختاری کا تصور پیش کیا گیا ہے، بھی اسی دن منظور کر لیا گیا۔ اپوزیشن کا مؤقف ہے کہ یہ بل ملک کی معاشی خودمختاری آئی ایم ایف کے حوالے کرنے کے مترادف ہے۔
وسط سال کے بجٹ کا مقصد 350 ارب روپے کے نئے ٹیکس عائد کرنا ہے جس سے زیادہ بوجھ کے شکار شہریوں میں ایک بار پھر قیمتیں بڑھنے کا خدشہ ہے۔
موبائل فون، پولٹری، لائیو اسٹاک، ڈیری اور بیکری آئٹمز پر سیلز ٹیکس بڑھا دیا گیا ہے جبکہ لیپ ٹاپ اور سولر پینلز پر ٹیکس چھوٹ واپس لے لی گئی ہے۔ یہاں تک کہ ہائبرڈ اور الیکٹرک گاڑیاں جن کو حکومت اپنی آٹو پالیسی میں فروغ دینا چاہتی ہے، مزید مہنگی ہونے والی ہیں۔
معاشی بحران کے باوجود حکومت کو یقین ہے کہ وبائی امراض کے دوران معیشت کو سنبھالنے کی کوششیں اچھی طرح سے کام کر رہی ہیں اور اسے ترقی کی رفتار کو برقرار رکھنے کی ضرورت ہے۔
سوالات اٹھائے جا رہے ہیں کیونکہ تیل کی قیمتیں ریکارڈ سطح پر ہیں، زرمبادلہ کے ذخائر کم ہو کر 23اعشاریہ 9 بلین ڈالر ہو گئے ہیں اور دسمبر میں افراط زر کی شرح ایک سال پہلے کے مقابلے میں 12اعشاریہ 3 فیصد بڑھ گئی ہے۔ تازہ ترین اضافے میں خوردنی اشیاء کا سب سے بڑا حصہ تھا اور حکومت خوراک کی قیمتوں کو کنٹرول کرنے میں ناکام رہی ہے۔
حکومت کے اس دعوے کو عالمی بینک تقویت دے گا جس نے پاکستان میں حیرت انگیز نمو کی اطلاع دی ہے جس کی حمایت زیادہ مانگ، ریکارڈ ترسیلات اور ایک موافق مانیٹری پالیسی ہے۔
پاکستان کی شرح نمو رواں مالی سال 3اعشاریہ 4 فیصد اور 2022-23 میں 4 فیصد رہنے کی توقع ہے اورخوراک اور توانائی کی بڑھتی ہوئی قیمتوں نے حکومت کو دباؤ میں ڈال دیا ہے۔
گوگل نیوز پر ہمیں فالو کریں
