گوگل نیوز پر ہمیں فالو کریںاسلام آباد:صدر مملکت ڈاکٹر عارف علوی کا کہنا ہے کہ ایران اہم مسلم اور برادر ہمسایہ ملک ہے،دونوں ممالک کے درمیان گہرے تاریخی، لسانی، مذہبی اور ثقافتی تعلقات ہیں۔
پاکستان سے ترکی اور آذربائیجان تک عالمی روڈ ٹرانسپورٹ سے پورے ای سی او خطے کو فائدہ پہنچے گا۔پاکستان جیو اقتصادی خوشحالی اور علاقائی روابط کے فروغ کو خصوصی اہمیت دیتا ہے۔
ان خیالات کا اظہار صدر مملکت ڈاکٹر عارف علوی نے دورہ ترکمانستان کے دوران ایران کے صدر سید ابراہیم رئیسی سے اشک آباد میں ملاقات کے دوران کیا۔صدر مملکت کا کہنا تھا کہ دونوں ممالک کے مابین تجارت اور معیشت کے دو طرفہ میکنزم کے باقاعدہ اجلاس ضروری ہیں۔
صدر مملکت ڈاکٹرعارف علوی نے کہا کہ دونوں ممالک افغانستان میں امن و استحکام کے قیام کے خواہاں ہیں۔ دونوں رہنماؤں نے دو طرفہ تعاون اور تعلقات مزید مستحکم بنانے پر اتفاق کیا۔ملاقات کے دوران افغانستان کی صورتحال پر بھی تبادلہ خیال کیا گیا۔
انہوں نے کہا کہ دونوں ممالک کے درمیان تجارتی تعلقات بڑھانے کے وسیع امکانات موجود ہیں جبکہ اقتصادی تعاون کی تنظیم علاقائی روابط کے فروغ میں اہم کردار ادا کررہی ہے۔
صدر مملکت نے کہا کہ معاشی تعاون اور علاقائی روابط مزید مستحکم کرنے کیلئے اقتصادی تعاون تنظیم کو مزید مضبوط بنانے کی ضرورت ہے
دونوں صدور نے دونوں ممالک کے مابین بڑھتے تعلقات اور دو طرفہ تعاون کی موجودہ سطح پر اطمینان کا اظہار کرتے ہوئے پاکستان اور ایران کے دوطرفہ تجارتی اور معاشی تعلقات بڑھانے پر اتفاق کیا۔
مزید پڑھیں: صدرِ مملکت کی ترکمانستان کے ہم منصب سے ملاقات، دوطرفہ تعلقات پر گفتگو
