مقبوضہ وادی میں بھارتی فوج کی دہشت گردی، مزید 5 کشمیری نوجوان شہید

سری نگر: بھارتی فوج نے مقبوضہ وادی میں بد ترین دہشت گردی کا سلسلہ جاری رکھا ہوا ہے، جموں و کشمیر کے مختلف علاقوں میں مزید 5 کشمیری نوجوانوں نے جامِ شہادت نوش کر لیا۔

تفصیلات کے مطابق مودی حکومت کے ایماء پر بھارتی فوج نے مقبوضہ وادی میں ظلم و ستم کا بازار گرم کر رکھا ہے۔ غاصب بھارتی فوجیوں نے جموں و کشمیر کے علاقے پلوامہ اور بڈگام میں 5 کشمیری نوجوانوں محاصرے کی آڑ میں شہید کردیا۔

یہ بھی پڑھیں:

بھارت نے 10 سال میں 1 لاکھ سے زائد کشمیریوں کو شہید کیا۔پاکستان

کشمیر میڈیا سروس کا کہنا ہے کہ پلوامہ کے علاقے نائیر میں 4 جبکہ بڈگام کے علاقے چرار شریف میں 1 کشمیری نے جامِ شہادت نوش کیا۔ مقبوضہ وادی میں لاک ڈاؤن کے نام پر انسانیت سوز بندشیں اور پابندیاں تاحال جاری ہیں۔ موبائل انٹرنیٹ بھی بند کردیا گیا۔

خیال رہے کہ اس سے قبل اقوامِ متحدہ میں پاکستان کے مستقل مندوب منیر اکرم نے کہا کہ بھارتی فوج نے 10 سال میں 1 لاکھ سے زائد کشمیریوں کو شہید کیا، ان کا خون بہایا اور بے شمار افراد پر تشدد کیا، ،مقبوضہ وادی کو ان گنت مسائل کا شکار بنا دیا۔

 نیو یارک میں 21 روز قبل مظلوم کشمیریوں کے حق میں منعقد کیے گئے ویبینار سے خطاب کرتے ہوئے اقوامِ متحدہ میں پاکستان کے مستقل مندوب منیر اکرم نے کہا کہ بھارت نے 1989 سے 1999 تک 10سال میں 1لاکھ سے زائد کشمیریوں کا خون بہایا۔