ناظم جوکھیو کی تفتیش کا رخ تبدیل، مزید 3 ملزمان گرفتار، جام اویس کا پروٹوکول ختم

کراچی: ناظم جوکھیو قتل کیس میں مقتول کی آڈیو اور ویڈیو کو مرکزی شواہد کے طور پر استعمال کرنے کا فیصلہ، پولیس نے گرفتار ملزمان سے تفتیش کی روشنی میں مزید 3 ملزمان کو گرفتار کرکے نامعلوم مقام پر منتقل کردیا، ایڈیشنل آئی جی نے جام اویس کو ہتھکڑی نہ لگانے کا سخت نوٹس لے لیا۔

پولیس کے ذرائع کے مطابق ناظم جوکھیو قتل کیس میں گرفتا ر ملزمان کے بیانات کی روشنی میں 3 افراد کو حراست میں لے کر نا معلوم مقام پر منتقل کردیا گیا ہے جبکہ تفتیشی ٹیم نے موبائل ڈیٹا کی مدد سے تفتیش تیز کردی ہے،تفتیشی حکام کے مطابق جام گوٹھ میں افضل جوکھیو،نیاز سالار،جام عبدالکریم کے موبائل فون کی لوکیش حاصل کر لی گئی ہیں۔

مزید پڑھیں:کراچی، ناظم جوکھیو قتل کی میڈیکل رپورٹ سامنے آگئی، تحقیقاتی ٹیم کا دورہ

ذرائع کے مطابق پولیس حکام نے مقتول کی آڈیو اور ویڈیو کو مرکزی شواہد کے طور پر استعمال کرنے کا فیصلہ کیا ہے تاہم پولیس تاحال مقتول کا موبائل فون برآمد کرنے میں کامیاب نہیں ہوسکی، باوثوق ذرائع کا کہنا ہےکہ مقتول کے موبائل فون میں قاتلوں کے دھمکی آمیز پیغامات اور فون کالز کا ریکارڈ مقدمہ میں اہم کردار ادا کرسکتا ہے۔

دوسری جانب ایڈیشنل آئی جی کراچی یعقوب منہاس نے ناظم جوکھیو قتل کیس کے ملزم رکن سندھ اسمبلی جام اویس کو پولیس کی جانب سے وی آئی پی پروٹوکول دینے کے حوالے سے اطلاعات کو مسترد کرتے ہوئے کہا ہے کہ جام اویس کی عدالت میں پیشی پر ہتھکڑی نہ لگانے پر متعلقہ افسر کے خلاف کارروائی کی جائے گی۔

کراچی میں میڈیا سے گفتگو کرتے ہوئے عمران یعقوب منہاس نے کہا کہ ناظم جوکھیو کیس کا مقدمہ اہل خانہ کی خواہش کے مطابق ہی درج کیا گیا اور کیس کی تفتیش بھی میرٹ پر کی جارہی ہے۔انہوں نے کہا کہ ایم پی اے جام اویس کو وی آئی پی پروٹوکول نہیں دیا جارہا، وہ اس وقت تھانے کے لاک اپ میں ہیں۔