اسلام آباد میں 18 ترقیاتی منصوبوں کی منظوری دے دی گئی

چیف کمشنر اسلام آباد کی سربراہی میں وفاقی دارالحکومت اسلام آباد کیلئے 18 ترقیاتی منصوبوں کی منظوری دے دی گئی ہے۔

تفصیلات کے مطابق اسلام آباد میں چیف کمشنر عامر علی احمد کی سربراہی میں اسلام آباد ورکنگ ویلفیئر پارٹی کا اجلاس ہوا جس میں رکنِ قومی اسمبلی راجہ خرم نواز، ڈی جی آئی سی ٹی شفق ہاشمی سمیت دیگر اعلیٰ حکام شریک ہوئے۔

ورکنگ ویلفیئر پارٹی اجلاس کے دوران مجموعی طور پر 18 ترقیاتی منصوبوں کی منظوری دی گئی جن کے تحت سڑکوں کی تعمیر، ،  نالہ جات کی تعمیر اور پلیوں سمیت مین واٹر سپلائی اور تحصیل آفس اسلام آباد میں ترقیاتی کام شروع کیے جائیں گے۔

اس موقعے پر گفتگو کرتے ہوئے چیف کمشنر اسلام آباد عامر علی احمد نے کہا کہ منصوبہ جات کی تعمیر میں تعمیراتی معیار کو یقینی بنایا جائے گا اور تمام منصوبے بروقت مکمل کیے جائیں گے تاکہ اسلام آباد کے شہری علاقوں کی طرح دیہی علاقوں میں بھی بنیادی سہولیات کو یقینی بنایا جا سکے۔

گفتگو کے دوران چیف کمشنر نے کہا کہ منصوبوں پر تقریباٍ ڈیڑھ ارب روپے کی لاگت آئے گی، جس سے شہریوں کی زندگی آسان بنانا مقصود ہے۔ ہم چاہتے ہیں کہ اسلام آباد کے شہری اور دیہی علاقوں کے عوام کی مشکلات کو کم سے کم کیا جائے۔