افغانستان میں کشیدگی بڑھ گئی، طالبان نے مزید 13اضلاع پر قبضہ کرلیا

کابل : نیٹو افواج کے انخلاء کے ساتھ افغانستان میں کشیدگی میں اضافہ ہوگیا، طالبان نے مزید 13 اضلاع پر قبضہ کرلیا۔

میڈیا رپورٹس کے مطابق اب تک افغان دارالحکومت کابل اور 34 صوبائی دارالحکومتوں کے علاوہ کل 372 اضلاع میں سے 110 پر طالبان نے قبضہ کر لیا ہے۔

صوبہ بدخشاں کے مرکز فیض آباد شہر کے رہائشیوں نے بتایا کہ سیکورٹی فورسز اور طالبان کے مابین جھڑپیں شہر کے قریب ہوگئی ہیں جس سے عوام کو ان کی حفاظت کے خدشات لاحق ہیں۔

مزید پڑھیں:پاک امریکا تعلقات میں تناؤ

دو روز قبل طالبان نے امریکی فوج کی چھوڑی 700 گاڑیوں اور گولہ بارود پر قبضہ کرلیاتھا، طالبان کے قبضے میں اس سے زائد امریکی گاڑیاں ہوسکتی ہیں ،700 سے زائد گاڑیوں کا تخمینہ ان ویڈیوز کی بنیاد پر لگایا گیا جو سوشل میڈیا پر سامنے آئی ہیں۔

بین الاقوامی میڈیا کے مطابق طالبان نے صرف جون کے مہینے میں 715 امریکی گاڑیاں تحویل میں لیں۔ طالبان نے آرمرڈ کیریئر گاڑیوں کے ساتھ سوشل میڈیا پر ویڈیوز شیئر کردیں، ان گاڑیوں پر سوار ہو کر طالبان افغانستان کے مزید علاقوں میں اپنا اقتدار مستحکم کریں گے۔قبضے میں لی گئی گاڑیوں میں ہموی، ٹرکس، آرٹلری گنز اور اسالٹ رائفلز شامل ہیں۔

دوسری جانب امریکی افواج کا انخلا تکمیل کے آخری مراحل میں داخل ہو چکا ہے اور عالمی برادری کی طرف سے طالبان کی افغانستان میں کارروائیوں پر کوئی موثر ردعمل بھی سامنے نہیں آیاہے۔