گوگل نیوز پر ہمیں فالو کریںاگر آپ سمجھتے ہیں کہ پیٹرول اسٹیشن صرف گاڑی میں ایندھن بھرانے کی جگہ ہوتا ہے، تو آپ نے بکیز کا مشاہدہ نہیں کیا۔ 2024 میں امریکی ریاست ٹیکساس میں کھلنے والا بکیز (Buc-ee’s) نہ صرف اپنی جسامت بلکہ اپنی جدید سہولیات، خدمات اور منفرد تجربے کی بدولت دنیا کا سب سے بڑا پیٹرول اسٹیشن بن چکا ہے۔
یہ عظیم الشان اسٹیشن 75,000 مربع فٹ رقبے پر محیط ہے، جو اسے دنیا کا سب سے بڑا پیٹرول اسٹیشن قرار دیتا ہے۔ اس سے پہلے یہ اعزاز ٹینیسی میں بکیز کے ایک اور اسٹیشن کے پاس تھا، جس کا رقبہ 74,000 مربع فٹ تھا۔
بکیز کے پیٹرول اسٹیشن پر 120 فیول پمپس جبکہ 600 سے زائد پارکنگ اسپیسز اور 20 جدید الیکٹرک گاڑیوں (EV) کے چارجنگ اسٹیشنز قائم کیے گئے ہیں۔
یہ اسٹیشن 24 گھنٹے کھلا رہتا ہے اور یہاں 200 سے زائد تربیت یافتہ ملازمین ہمہ وقت صارفین کو خدمات فراہم کرنے کے لیے موجود ہوتے ہیں، جو مہمان نوازی اور صفائی میں اپنی مثال آپ ہیں۔
بکیز صرف پیٹرول اسٹیشن نہیں بلکہ ایک مکمل فوڈ مارکیٹ ہے۔ یہاں دستیاب چند مشہور آئٹمز میں شامل ہیں جس میں ہوم میڈ فَج (Fudge)، اسپیشل باربی کیو سینڈوچز، تازہ بیکری آئٹمز ،بیور نگٹس (Beaver Nuggets) اور دیگر مزیدار اسنیکس دستیاب ہیں۔
بکیز کے باتھ رومز اپنے انتہائی صاف، کشادہ اور جدید ڈیزائن کی وجہ سے صارفین میں بے حد مقبول ہیں۔ یہ سہولت اسے روایتی پیٹرول اسٹیشنز سے بالکل منفرد بناتی ہے۔
اس عظیم اسٹیشن میں ایک بڑی گفٹ شاپ بھی موجود ہے جہاں سے آپ سووینئرز، مقامی مصنوعات، اور خصوصی تحائف خرید سکتے ہیں ایک ایسا تجربہ جو ہر مسافر کی یادوں میں بس جائے۔
بکیز، ٹیکساس اب صرف ایک پیٹرول اسٹیشن نہیں، بلکہ سفر کے دوران ایک منزل بن چکا ہے۔ اپنے حجم، معیار، اور صارف دوستی کی بدولت یہ اسٹیشن عالمی سطح پر ایک نئی مثال قائم کر رہا ہے۔
اگر آپ امریکا کے ٹیکساس میں ہیں، تو بکیز کا دورہ ضرور کریں یہ محض ایک اسٹاپ نہیں، بلکہ ایک یادگار تجربہ ہے۔
