مقبوضہ کشمیر میں قابض بھارتی فورسز نےضلع کٹھوعہ میں دو نوجوانوں کوفائرنگ کرکےجبکہ تیسرے نوجوان کو تھانے میں بہیمانہ تشدد کا نشانہ بنا کر شہیدکردیا۔

مقبوضہ کشمیرمیں بھارتی فورسزکی ریاستی دہشتگردی جاری ہے، کرفیو کے 42ویں روزقابض فورسز نےمزید 3 کشمیری نوجوانوں کوبےدردی سے شہید کردیا جس کےبعدوادی میں کہرام مچ گیا۔

شہید نوجوانوں کے لواحقین نے قابض فورسز کے خلاف شدید احتجاج کیا،کشمیری گھروں سے باہر نکل آئے اور بھارت کے خلاف شدید نعرے بازی کی، بھارتی فوج نے کشمیریوں‌ پر پیلٹ گنوں سےفائرنگ کی جس سے متعدد کشمیری زخمی ہو گئے۔

واقعے کےبعدمقبوضہ وادی میں  کرفیو مزید سخت کردیا گیا ہے، جبکہ انٹرنیٹ اور موبائل فون سروس بھی پہلے سے بند ہے جبکہ کرفیوکے42ویں روزتک  بھارتی فوج 40 ہزار سے زائد کشمیریوں کو گرفتار کر چکی ہے۔

مقبوضہ وادی میں مسلسل 42دن سےجاری لاک ڈاؤن کی وجہ سے وادی میں بچوں کے دودھ، ادویات اور اشیائے ضروریہ کی شدید قلت ہوگئی ہے، دوائیں ناپید ہونے سے مریض تڑپ رہے ہیں۔ شہریوں کا کہنا ہے کہ گھر سے نکل نہیں سکتے۔ کئی روز بعد پیاروں کے مرنے کی اطلاع ملتی ہے۔

تاہم  تمام تر بندشوں کے باوجود بھارتی فورسز کشمیریوں کا جذبہ آزادی نہ دباسکیں اوروادی میں بھارت مخالف مظاہروں کاسلسلہ جاری ہے۔  

واضح رہے کہ بھارت نے 5 اگست کو صدارتی حکم نامے کے ذریعے کشمیر کی خصوصی حیثیت ختم کردی تھی جس کےبعدسےوادی میں کرفیونافذ ہے، اورکشمیر دنیا کی سب سے بڑی جیل میں تبدیل ہوچکاہے، کرفیوکو42روزگزرچکےہیں اورکشمیری مسلمانوں کو نہ کھانے پینے کی اشیا دستیاب ہیں اور نہ ہی دیگر ضروریات زندگی مہیا کی جا رہی ہیں۔

وادی کے ہر گلی کوچے پر بھارتی فوجی تعینات ہیں جن کےپاس خطرناک اسلحہ موجود ہے، کوئی شہری انتہائی ضرورت کے تحت اپنے گھر سے نکلنے کی کوشش کرے تو پیلٹ گنز سے شدید زخمی کر دیا جاتا ہے، ظلم کی انتہا کہ ہسپتالوں میں ادویات تک ختم ہو چکی ہیں اور مریضوں کی حالت انتہائی خراب ہے۔