ٹی وی چینل نے ہتک عزت کا مقدمہ ہارنے کے بعد اسحاق ڈار سے معافی مانگ لی

لندن: اے آر وائی یو کے کے براڈ کاسٹر نجی چینل نیو ویژن ٹی وی نے بدعنوانی، منی لانڈرنگ اور اختیارات کے غلط استعمال کے الزامات میں ہتک عزت کا مقدمہ ہارنے کے بعد پاکستان مسلم لیگ (ن) کے رہنما اسحاق ڈار سے معافی مانگ لی ہے۔

چینل کی جانب سے 8 جولائی 2019 اور 8 اگست 2019 کو نشر ہونے والے دو نیوز شوز میں ہتک آمیز ریمارکس دیئے گئے تھے۔ پروگرام میں وزیراعظم کے معاون شہزاد اکبر نے الزام لگایا تھا کہ اسحاق ڈار منی لانڈرنگ اور کرپشن میں ملوث ہیں۔

شہزاد اکبر نے الزام لگایا تھا کہ اسحاق ڈار نے پاکستان میں فنانشل مانیٹرنگ یونٹ کے کاموں کو منظم اور فعال طور پر روک دیا تھا تاکہ اداروں کو سسٹم تک رسائی سے روکا جا سکے۔ یہ بھی الزام لگایا گیا تھا کہ اسحاق ڈار نے یہ اقدامات “چوہدری شوگر ملز منی لانڈرنگ کیس میں ملوث افراد کی حفاظت” کے لیے کیے تھے۔

یہ بھی پڑھی

پی ڈی ایم نے مہنگائی کیخلاف 20اکتوبر سے مظاہروں کااعلان کردیا

شمالی وزیرستان میں دہشتگردوں کا فورسز کی چیک پوسٹ پر حملہ، سپاہی شہید

لندن ہائی کورٹ میں سابق وزیر خزانہ اسحاق ڈار سے معافی مانگتے ہوئے این وی ٹی وی نے تسلیم کیا ہے کہ اسحاق ڈار کے خلاف اس کے الزامات جھوٹے ، من گھڑت اور بے بنیاد تھے۔ ٹی وی چینل نے اسحاق ڈار کی ساکھ کو نقصان پہنچانے اور بدنامی کی وجہ سے ہرجانہ ادا کرنے رضامندی ظاہر کی ہے۔

اے آر وائی یوکے نے تسلیم کیا ہے کہ اسحاق ڈار نے کبھی بھی فنانشل مانیٹرنگ یونٹ کا انتظام نہیں کیا، نہ ہی اس کے کام میں کبھی رکاوٹ ڈالی اور نہ ہی انہوں نے مبینہ طور پر چوہدری شوگر ملز کیس سمیت کسی کی حفاظت کے لیے کچھ کیا۔”

لندن ہائی کورٹ میں اپنے مقدمے کا دفاع کرتے ہوئے اسحاق ڈار نے دعویٰ کیا تھا کہ ان دونوں پروگرامز میں لگائے گئے الزامات کا مطلب یہ سمجھا گیا تھا کہ انہوں نے پاکستان میں پیسے چوری کیے ہیں۔ پروگرامز میں دعویٰ کیا گیا تھا کہ ان کے بینک کھاتوں کو سراغ لگا لیا گیا جن میں ایک ارب ڈالر کی منی لانڈرنگ کی گئی تھی۔

اسحاق ڈار نے دعویٰ کیا تھا کہ پروگرامز میں جو الزامات لگائے گئے وہ انتہائی ہتک آمیز تھے بلکہ انھیں مجرم قرار دیا گیا ہے۔ اسحاق ڈار کا کہنا تھا کہ ان الزامات نے ان سیاسی ساکھ کو سنگین نقصان پہنچایا ہے اور انہیں شدید شرمندگی کا سامنا کرنا پڑا ہے۔

کیس کے نتائج پر تبصرہ کرتے ہوئے اسحاق ڈار نے کہا ہے کہ الحمدللہ۔ مجھے یو کے ہائی کورٹ سے انصاف کی امید تھی اور وہ مجھے مل گیا ، آج انصاف غالب آگیا ہے۔ مجھ پر الزامات لگانے والے جھوٹے ثابت ہو گئے۔