افغان طالبان کاامداد کے حصول کیلئے آئندہ ہفتے ناروے کا دورہ متوقع

اوسلو :ناروے کی وزیرخارجہ اینیکن ہوئی ٹفیلڈٹ نے کہا ہے کہ طالبان کی جانب سے امداد کے حصول کیلئے اگلے ہفتے اوسلوآمد متوقع ہے۔

میڈیارپورٹس کے مطابق ناروے کی وزارت خارجہ نے بیان میں کہا کہ مذکورہ دورہ اتوار سے منگل تک شیڈول ہے اور طالبان ناروے کے حکام اور متعدد اتحادی ممالک کے عہدیداروں سے ملاقات کریں گے، جس کا مقصد افغانستان میں انسانی صورت حال اور انسانی حقوق کے حوالے سے مذاکرات کرنا ہے۔

ناروے کی وزیر خارجہ اینیکن ہوئی ٹفیلڈٹ نے کہا کہ ‘ہمیں افغانستان کی سنگین صورت حال پر تشویش ہے، جہاں لاکھوں افراد کو بدترین انسانی بحران کا سامنا ہے۔

مزید پڑھیں:دہشت گردی کی کارروائیوں میں تیزی

ان کا کہنا تھا کہ افغانستان میں عوام کی مدد کے لیے یہ ضروری ہے کہ عالمی برادری اور معاشرے کے مختلف حلقوں سے تعلق رکھنے والے افغانوں کو طالبان کے ساتھ بات کی جائے۔

انہوں نے واضح کیا کہ مذاکرات کا مطلب طالبان کو جواز بخشنا یا تسلیم کرنا نہیں ہے۔

اینیکن ہوئی ٹفیلڈٹ نے کہا کہ ہمیں ملک کے ڈی فیکٹو حکام سے بات کرنی چاہیے، ہم سیاسی صورت حال کے پیش نظر بدترین انسانی بحران پیدا کرنے کی اجازت نہیں دے سکتے ہیں۔