بنگلہ دیش کے خلاف ٹی 20 میچ کیلئے قومی کرکٹ ٹیم کے 12کھلاڑیوں کا اعلان

ڈھاکہ: پاکستان کرکٹ بورڈ نے بنگلہ دیش کے خلاف پہلا ٹی 20 میچ کھیلنے والی قومی ٹیم کے 12 کھلاڑیوں کے ناموں کا اعلان کردیا جو مختصر فارمیٹ کے میچ میں بیٹنگ، بالنگ اور فیلڈنگ سمیت ہر شعبے میں کارکردگی کا مظاہرہ کریں گے۔

تفصیلات کے مطابق پاکستان اور بنگلہ دیش کے مابین 3 میچوں کی  ٹی ٹوئنٹی سیریز کا پہلا میچ آئندہ روز جمعہ کے دن شیر بنگلہ کرکٹ اسٹیڈیم میں ہوگا۔ مقامی وقت کے مطابق دوپہر 2  بجے میچ کا آغاز ہوجائے گا۔

یہ بھی پڑھیں:

پی ایس ایل کی ٹائٹل اسپانسرشپ 2025 تک ایچ بی ایل کے حوالے

شعیب اختر کی ویڈیو پر شاہد آفریدی کا رد عمل سامنے آگیا

قومی ٹیم کی قیادت حسبِ سابق کپتان بابر اعظم کریں گے جبکہ نائب کپتانی کے فرائض شاداب خان انجام دے رہے ہیں۔ نئی ٹیم میں خوشدل شاہ، فخر زمان، حیدر علی، حارث رؤف، حسن علی، محمد نواز اور محمد رضوان (وکٹ کیپر)بھی شامل ہیں۔

قومی کرکٹ ٹیم کے 12 ناموں میں محمد وسیم جونیئر، شاہین شاہ آفریدی اور شعیب ملک بھی شامل ہیں۔ سیریز کا دوسرا اور تیسرا ٹی 20 انٹرنیشنل میچ بھی بالترتیب 20 اور 22 نومبر کو شیر بنگلہ کرکٹ اسٹیدیم میں ہی کھیلا جائے گا۔ 

خیال رہے کہ اس سے قبل پاکستان کرکٹ ٹیم کے کپتان بابر اعظم اور سینئر آل راؤنڈر شعیب ملک بنگلہ دیش کے دارالحکومت ڈھاکہ پہنچ گئے، دونوں کھلاڑیوں کے کورونا ٹیسٹ کا نتیجہ منفی نکلا جس کے بعد انہوں نے ٹیم جوائن کر لی۔

 کپتان بابر اعظم بنگلہ دیش میں کل سے شروع ہونے والی سیریز کھیلنے کے دوران  قومی  ٹیم کی قیادت کریں گے۔ کرکٹ بورڈ کا کہنا ہے کہ بابر اور شعیب ملک نے کورونا ٹیسٹ کا نتیجہ منفی آنے پر ڈھاکہ کے ہوٹل میں مقیم قومی اسکواڈ کو جوائن کیا۔