کالعدم ٹی ایل پی کیساتھ معاہدہ وزیراعظم کی منظوری سے ہوا، مذاکرات اب بھی جاری ہیں،شیخ رشید

اسلام آباد: وزیر داخلہ شیخ رشید احمد نے کہا ہے کہ حکومت اور کالعدم تحریک لبیک پاکستان کے زیر حراست سربراہ سعد حسین رضوی کے درمیان جاری احتجاج ختم کرنے کے لیے مذاکرات جاری ہیں۔

وزیر اعظم عمران خان کی جانب سے ملک میں امن و امان کی صورتحال کا جائزہ لینے کے لیے بلائے گئے قومی سلامتی کمیٹی کے اجلاس میں شرکت کے بعدصحافیوں سے بات چیت کرتے ہوئے شیخ رشید نے کہا کہ اجلاس میں کالعدم ٹی ایل پی کے احتجاج پر خصوصی طور پر غور کیا گیا۔

انہوں نے مزید کہا کہ حکومت احتجاجی مارچ کے معاملے کا “خوشگوار” طریقے سے حل کرنا چاہتی ہے،ان کا کہنا ہے کہ احتجاج نے پنجاب کے کئی شہروں میں نظام زندگی درہم برہم کر دیا ہے۔ انہوں نے مزید کہا کہ لوگوں کی جان و مال کا تحفظ حکومت کی ذمہ داری ہے۔

مزید پڑھیں:وزیراعظم عمران خان کا سعد رضوی کو کسی صورت رہا نہ کرنیکا اعلان

شیخ رشید نے کہا کہ وزیر اعظم عمران خان کل موجودہ ملکی حالات کے بارے میں قوم سے خطاب کریں گے اورپوری صورتحال قوم کے سامنے پیش کریں گے اور ان کی تقریر حکومت کے بیانیے کی وضاحت کرے گی۔

ٹی ایل پی کے احتجاج کے حوالے سے تفصیلات بتاتے ہوئے وزیر داخلہ نے کہاکہ کالعدم تنظیم کے ساتھ جھڑپوں میں 4 پولیس اہلکار شہید جبکہ 80 سے زائد زخمی ہوئے جن میں سے 8 کی حالت نازک ہے۔

ان کا کہنا تھا کہ ہم اپنے موقف پر قائم ہیں اور انتظار کر رہے ہیں کہ ٹی ایل پی جی ٹی روڈ کھولنے کے اپنے وعدے کی پاسداری کرے، انہوں نے مزید کہا کہ یہ بھی توقع ہے کہ وزیر برائے مذہبی امور نور الحق قادری ٹی ایل پی کی قیادت سے دوبارہ بات کریں گے۔

کالعدم ٹی ایل پی کے ایک مطالبے کا حوالہ دیتے ہوئے انہوں نے کہا کہ حکومت فرانسیسی سفیر کی بے دخلی کا معاملہ پارلیمنٹ میں لے گئی ہے لیکن ہمیں ایسا لگتا ہے کہ اپوزیشن اسکے حق میں ووٹ نہیں دے گی۔

انہوں نے مزید کہا کہ کالعدم ٹی ایل پی کے سوشل میڈیا اکاؤنٹس ملک سے باہر سے چلائے جا رہے تھے ۔ایک اور سوال کے جواب میں وزیر داخلہ نے کہا کہ انہوں نے کالعدم تنظیم کے ساتھ معاہدہ وزیراعظم کی منظوری کے بعد کیا۔