ایف اے ٹی ایف اہداف،کرنسی اسمگلنگ کی روک تھام کیلئے قانون مزید سخت کرنیکا فیصلہ

کراچی:ایف اے ٹی ایف اہداف پر پیشرفت رپورٹ دینے کی ڈیڈ لائن قریب آگئی ہے، کرنسی اسمگلنگ کی روک تھام کے لیے قانون مزید سخت کرنے کا فیصلہ کیا گیا ہے۔

ایف بی آر ذرائع کے مطابق قانون ابتدائی طور پر آرڈیننس کی شکل میں نافذ ہوگا، آرڈیننس کو بجٹ میں قانون کی شکل دے دی جائے گی۔

قانون کا مقصد کیش کوریئرز کے ذریعے کرنسی کی اسمگلنگ روکنا ہے، کیش کوریئرز کیخلاف ایکشن ایف اے ٹی ایف کا ہدف ہے، کم وقت میں ہدف حصول کیلئے قانون پارلیمنٹ میں نہیں لایا جاسکتا۔

مزید پڑھیں:سپریم کورٹ کا پی آئی اے ملازمین کی ڈگریاں چیک کرانے اور ڈگریوں کی تصدیق کا حکم

ذرائع کے مطابق انسداد منی لانڈرنگ آرڈیننس 8 جنوری 2020 سے پہلے لائے جانے کا امکان ہے، ایف اے ٹی ایف کو 8 جنوری تک 150 سوالات کے جوابات کی رپورٹ دینا ہے۔

ایف اے ٹی ایف کے سوالات میں کرنسی اسمگلنگ کی روک تھام کے سوال بھی موجود ہیں۔ واضح رہے کہ پاکستان کا نام ایف اے ٹی اے کی گرے لسٹ میں شامل ہے جبکہ ایف اے ٹی ایف نے پاکستان اصلاحات کیلئے فروری تک کا وقت دے رکھا ہے۔