فیروز خان اور ثناء ایک بار پھر نئے ٹی وی سیریل میں ساتھ اداکاری کیلئے تیار

پاکستانی شوبز انڈسٹری کے معروف اداکار فیروز خان اور ثناء جاوید کی ہٹ جوڑی ایک بار پھر نئے ٹی وی سیریل اے مشتِ خاک میں ایک ساتھ اداکاری کے جوہر دکھانے کیلئے تیار ہے جس کا ٹیزر ریلیز کردیا گیا۔

یوٹیوب پر 7دسمبر کو ریلیز کیے گئے ٹریلر کو اب تک 7 لاکھ 80ہزار کے قریب سوشل میڈیا صارفین نے دیکھ لیا جن میں سے 23 ہزار نے 1منٹ 11 سیکنڈ کی تعارفی ویڈیو کو پسندیدگی کی سند عطا کردی۔ نیا ٹی وی سیریل کل سے نشر کیا جائے گا۔

ڈرامہ سازوں کے مطابق اے مشتِ خاک کی کہانی 2 مختلف کرداروں پر مبنی ہے۔ مستجاب ایک عملیت پسند نوجوان ہے جو تقدیر پر کم ہی یقین کرتا ہے جبکہ اس کے مقابلے میں ثنا جاوید دعا کے کردار میں نظر آئینگی جس کا قسمت پر یقین پختہ ہے۔

یہ بھی پڑھیں:

ماہرہ نے ڈرامہ ’ہم کہاں کے سچے تھے‘ کے بارے میں غلط فہمی دور کردی

کترینہ کیف نے صبر، شکر اور خوشی کے پیغام سے مداحوں کے دل جیت لئے

دعا مضبوط اخلاقی اقدار کی حامل ہمدرد فطرت کی لڑکی دکھائی گئی ہے۔ ڈرامے کے مختلف حالات کے تناظر میں مستجاب دعا پر فدا ہوجاتا ہے جو اس کے جذبات کا مثبت جواب نہیں دیتی اور مستجاب کی پسندیدگی پیار سے جنون میں بدل جاتی ہے۔

مستجاب اپنی من چاہی محبت کو حاصل کرنے کیلئے جھوٹ کا سہارا لیتا ہے۔ سوال یہ ہے کہ کیا دعا مستجاب کی حقیقت کو جان لے گی یا مستجاب دعا کے خدا پر پختہ یقین کا پیروکار بنے گا۔ ٹی وی سیریل کی کہانی معروف ڈرامہ نگار ماہا ملک نے تحریر کی ہے۔

ہدایتکاری کے فرائض احسن طالش جبکہ پروڈکشن کے عبداللہ کادوانی اور اسد قریشی نے سرانجام دئیے ہیں۔ ثناء جاوید اور فیروز خان کے علاوہ ڈرامے میں اسد صدیقی، شبیر جان، عفت عمر، شہود علوی، دانیال افضل، حرا عمر اور دیگر اداکار شامل ہیں۔