وفاقی کابینہ نے غریبوں کیلئے احساس ٹارگٹڈسبسڈی پروگرام منظورکرلیا

اسلام آباد: وزیر اعظم عمران خان کی زیر صدارت وفاقی کابینہ اجلاس کے دوران ملک بھر میں احساس ٹارگٹڈ سبسڈی پروگرام کی منظوری دے دی گئی ہے۔

تفصیلات کے مطابق گزشتہ روز وزیراعظم عمران خان کی زیر صدارت وفاقی کابینہ کا اہم اجلاس ہوا جس میں کالعدم ٹی ایل پی سے معاہدے سمیت ملکی سیاسی و معاشی صورتحال کا جائزہ لیتے ہوئے مشاورت اور اہم فیصلے کیے گئے۔

یہ بھی پڑھیں:

وزیر اعظم غریب عوام کیلئے ریلیف پیکیج کا اعلان آج کریں گے

پاکستان کا قومی سلامتی کانفرنس برائے افغانستان میں شرکت نہ کر نے فیصلہ

وفاقی کابینہ اجلاس کے بعد جاری کیے گئے اعلامیے کے مطابق کابینہ ممبران نے ملک بھر میں احساس ٹارگٹڈ سبسڈی پروگرام کی اصولی منظوری دے دی۔ اراکین نے عزم ظاہر کیا کہ غریب طبقے کو مہنگائی کے اثرات سے بچانے کیلئے ریلیف فراہم کرینگے۔ 

کابینہ اجلاس کے دوران احساس آرڈیننس 2021 اور ڈاکٹر عنایت حسین کو بطور ڈپٹی گورنر اسٹیٹ بینک تعینات کرنے کی منظوری دے دی گئی۔ بریفنگ کے دوران بتایا گیا کہ خطے کے دیگر ممالک سے موازنہ کیا جائے تو پاکستان میں اشیائے ضروریہ کم قیمت ہیں۔

اراکینِ وفاقی کابینہ کو بریفنگ کے دوران بتایا گیا کہ دیگر ملکوں کے مقابلے میں پاکستان میں چنے، آٹا، دال مونگ، دال ماش، پیاز، ٹماٹر، پیٹرول اور چکن سستے ہیں۔ فیصلہ ہوا کہ وزارتِ خارجہ و دفاع کے زیر استعمال بلڈنگز کی دیکھ بھال متعلقہ وزارتیں کرینگی۔ 

وزیر اعظم عمران خان کی زیر صدارت وفاقی کابینہ نے وزارت خارجہ و دفاع کیلئے تعمیراتی منصوبہ شروع کرنے سے قبل این او سی لینا ضروری قرار دے دیا۔ ملازمین کیلئے الاٹمنٹ پالیسی تشکیل دینے کیلئے کمیٹی بھی قائم کی گئی۔