سی بی سی پمپنگ اسٹیشن سے پانی ٹینکرز کو فروخت، عوام بوند بوند کو ترس گئے

کراچی :کنٹونمنٹ بورڈ کلفٹن کے زیر انتظام پمپنگ اسٹیشن غیر قانونی ہائیڈرنٹ میں تبدیل ہو گئے جہاں ضرورت مندوں کو مہنگے داموں ٹینکرز فروخت ہونے لگے، ٹینکر مافیا نے واٹر سپلائی سسٹم میں مکمل طور پنجے گاڑ لئے جس کے باعث پانی کے بدترین بحران کا پیدا ہو گیا جبکہ کنٹونمنٹ کے سی ای او نے خود کو ایئر کنڈیشن دفتر تک محدود کر لیا ۔

ذرائع کے مطابق کنٹونمنٹ بورڈ کلفٹن کے آفس میں عوام کی سی ای او تک رسائی کو ناممکن بنا دیا گیا کنٹونمنٹ بورڈ جو کہ 10وارڈ پر مشتمل ہے اس کی حد کالا پل سے دو دریا تک ہے اس ادارے کی ذمہ داری ہے کہ وہ اپنے مکینوں کو صاف ستھرا پانی فراہم کرے مگر واٹر سپلائی پر مامور افسران پمپنگ اسٹیشنوں سے عوام کو پانی فراہم کرنے کی بجائے ٹینکر مافیا سے ساز باز کر رکھی ہے اس وجہ سے پورا علاقہ پانی کے بحران کی لپیٹ میں ہے۔

مزید پڑھیں:ایم کیوایم 24تا26ستمبرایام ہجرت منائے گی،فیصل سبزواری

پانی کے شدید بحران کے باعث سب سے زیادہ وارڈ 8دہلی کالونی اور وارڈ 9پنجاب کالونی متاثر ہورہے ہیں جہاں مختلف اوقات میں ایک ایک گھنٹے کیلئے پانی کھولنے کا شیڈول ہے مگر ان اوقات میں بھی غیر اعلانیہ کمی کر دی گئی ہے بعض علاقوں میں ٹائمنگ 30منٹ اوربعض علاقوں میں 40منٹ کر دی گئی ہے۔

پنجاب کالونی کے عوام کا کہنا ہے کہ گلی نمبر 1سے 10 تک پانی آخری سے تک نہیں جا تا اس کی وجہ یہ ہے کہ پمپنگ اسٹیشن سے پانی پورے پریشر کے ساتھ نہیں کھولاجاتا بعض حلقوں کا یہ بھی کہنا ہے کہ اس پمپنگ اسٹیشن سے کنٹونمنٹ کے ٹینکرز بھی بھرے جاتے ہیں جو شیڈول کے مطابق مساجد اور متاثرہ علاقوں میں ہنگامی بنیاد پر بھیجے جاتے ہیں مگر کنٹونمنٹ کے بد عنوان عملے نے یہاں ٹینکرز کی فراہمی کو بھی آمدنی کا ذریعہ بنا لیا ہے۔

اس وجہ سے ان علاقوں کے عوام کو پانی کے بحران کا سامنا ہے کیونکہ ان کے کوٹے کا پانی فروخت کر دیا جاتا ہے اسی طرح کی شکایات کا سامنا ہے۔