ڈیرہ اسماعیل خان کی میئر شپ کیلئے اے این پی کے امیدوار عمر خطاب شیرانی قتل

ڈیرہ اسماعیل خان :عوامی نیشنل پارٹی کے ایک سینئر رہنما اور ڈیرہ اسماعیل خان شہر کی میئر شپ کے امیدوار کو ان کے گھر کے باہر گولی مار کر ہلاک کر دیا گیا۔

موٹر سائیکل پر سوار نامعلوم مسلح افراد نے عمر خطاب شیرانی کو ماڈل ٹاؤن کے علاقے میں ان کی رہائش گاہ کے باہر نشانہ بنایا۔

عمر خطاب بلدیاتی انتخابات میں ڈی آئی خان سٹی میئر شپ کے امیدوار تھے جس کا پہلا مرحلہ کل ہوگا جبکہ واقعہ کے بعد ڈیرہ اسماعیل خان میں میئر شپ کا انتخاب ملتوی ہونے کا امکان ہے۔

مزید پڑھیں:انسداددہشت گردی عدالت کراچی نے پروین رحمان قتل کیس کافیصلہ سنادیا

پولیس جائے وقوعہ پر پہنچ گئی ہے اور حملہ آوروں کی تلاش کے دوران علاقے کو گھیرے میں لے لیا ہے۔

واضح رہے کہ ایک روز قبل پولیس اور ایجنسیوں نے ڈیرہ اسماعیل خان کے علاقے کلاچی میں دہشت گردوں کے خلاف انٹیلی جنس کی بنیاد پر آپریشن کیا تھا۔

آپریشن کے دوران انتہائی مطلوب دہشت گرد کمانڈر طاہر زمان عرف باسط مارا گیا۔ سیکورٹی فورسز نے اس کے قبضے سے دستی بم اور اسلحہ بھی برآمد کیا۔