مہلک کورونا وائرس کا اثر مختلف ممالک پر مختلف ہوا ہے۔زرتاج گل وزیر کی وضاحت

اسلام آباد: وفاقی وزیر برائے موسمیاتی تبدیلی زرتاج گل وزیر نے اپنے ایک بیان کی وضاحت کرتے ہوئے کہا ہے کہ مہلک  کورونا وائرس کا اثرمختلف ممالک پر مختلف ہوا ہے۔

سماجی رابطے کی ویب سائٹ ٹوئٹر پر اپنے ایک پیغام میں وفاقی وزیر زرتاج گل وزیر نے اپنے ایک بیان کی وضاحت کرتے ہوئے کہا کہ میں ہر روز گھنٹوں ٹی وی چینلز پر لائیو آ کرکسی پرچی کے بغیر گفتگو کرتی ہوں۔

پیغام میں وزیرِمملکت زرتاج گل وزیر نے کہا کہ میں کہنا چاہتی تھی کہ وباءکااثر اور شدت مختلف ممالک میں مختلف ہوا ہے، تاہم میری بات کا وہ مطلب نہیں لیا گیا جو لیا جانا چاہئے تھا۔

وفاقی وزیر زرتاج گل وزیر نے تنقیدکرنے والے افراد پر طنز کرتے ہوئے  کہا کہ چند لمحوں کی خطا پر یوں ماتم کناں ہونے کی بجائے اپنی سیاسی جماعتوں کے حشر نشر پر توجہ دیں۔

زرتاج گل وزیر نے کہا کہ اگر آپ اپنی سیاسی جماعتوں پر توجہ دیں تو شاید آپ کے حق میں بہتر ہو۔ میں تنقید سے گھبرانے کی بجائے مزید مضبوط ہوجاتی ہوں۔

روزانہ ٹی وی پر گھنٹوں بات کرتی ہوں، پرچی کے بغیر۔ ????

کہنا چاہتی تھی کہ وباء کا اثر، شدت مختلف ممالک میں مختلف ہیں۔

چند لمحوں کی خطاء پر یوں ماتم کناں ہونے کی بجائے اپنی جماعتوں کے حشر نشر پر توجہ دیں تو شائد ان کے حق میں بہتر ہو۔ تنقید سے نہیں گھبراتی، اور مظبوط ہوتی ہوں۔ ????

— Zartaj Gul Wazir (@zartajgulwazir) June 20, 2020

واضح رہے کہ وفاقی وزیر زرتاج گل وزیر کے مذکورہ بیان میں انہوں نے فرمایا تھا کہ کورونا وائرس کو کووِیڈ 19 اِس لیے کہا جاتا ہےکہ اس کے 19 پوائنٹس ہیں جو کسی بھی ملک پر کسی بھی طریقے سے نافذ کیے جاسکتے ہیں۔

بیان کو غلط قرار دیتے ہوئے سوشل میڈیا صارفین نے اس پر تنقید کی۔ بعض نے کہاکہ زرتاج گل وزیرکو وزیرِمملکت کا عہدہ کس نے دیا؟ کچھ نے وضاحت کی کہ کووِیڈ19 کانام اسلیے دیا گیا کیونکہ یہ سن 2019ءمیں آیا تھا۔