پاکستان سمیت دنیا بھر میں صحت کا عالمی دن آج منایا جارہا ہے

جنیوا: پاکستان سمیت دنیا بھر میں صحت کا عالمی دن آج منایا جارہا ہے جس کا مقصد عوام کی توجہ تندرست طرزِ زندگی کی طرف دلانا ہے جبکہ عالمی ادارۂ صحت کے قیام کو 74برس مکمل ہوگئے۔

تفصیلات کے مطابق اقوامِ متحدہ کے ذیلی ادارے ورلڈ ہیلتھ آرگنائزیشن نے رواں برس صحت کے عالمی دن کا موضوع  ہمارا سیارہ ہماری صحت رکھا ہے۔ادارۂ صحت کا کہنا ہے کہ کورونا اور آلودہ سیارے زمین پر کینسر، استھما اور دل کی بیماریاں بڑھ رہی ہیں۔

یہ بھی پڑھیں:

آٹزم سے آگہی کا عالمی دن، ذہنی معذور افراد اور ملک و قوم کی ذمہ داریاں

ادارۂ صحت کا کہنا ہے کہ آج عالمی یومِ صحت کے موقعے پر ہماری توجہ تمام انسانوں اور زمین کو صحت و تندرستی کی طرف لے جانے پر رہے گی تاکہ تمام انسان ایسی تحریک میں شریک ہو جو بہتر صحت مندانہ طرزِ زندگی پر مبنی معاشرے تشکیل دے۔ 

تاریخی اعتبار سے عالمی ادارۂ صحت نے 7 اپریل 1948ء کے روز اپنے قیام کے بعد پہلی بار ہیلتھ اسمبلی کا اجلاس بلایا جس میں  ہر سال 7 اپریل کو عالمی یومِ صحت منانے کی تجویز دی گئی۔اسی تجویز کے تحت ہر سال یومِ صحت منایا جانے لگا۔

ہر سال عالمی یومِ صحت منانے کا مقصد دنیا کے ہر انسان کی توجہ صحت و صفائی اور تندرست طرزِ زندگی کی جانب مبذول کرانا ہے۔ ادارۂ صحت کا کہنا ہے کہ ترقی پذیر ممالک میں شعبۂ صحت پر توجہ نہ دینے کی وجہ معاشی مسائل کی بھرمار ہے۔