گوگل نیوز پر ہمیں فالو کریںبھارت نژاد اسلامی اسکالر مفتی حامد پٹیل برطانیہ کے اہم ترین سرکاری تعلیمی محکمے ‘آفسٹڈ’ کے عبوری چیئرمین مقرر کردیے گئے، جس پر اسلام مخالف نسل پرست گروہوں نے سوشل میڈیا پر ہنگامہ برپا کر دیا۔
اس سے قبل آفسٹڈ نے 11 مارچ کو ان کی تقرری کا اعلان کرتے ہوئے کہا تھا کہ سر حامد پٹیل کو آفسٹڈ بورڈ کے عبوری چیئرمین کے طور پر اس وقت تک خدمات انجام دینے کے لیے مقرر کیا گیا ہے جب تک کہ مارچ 2025 میں مستعفی ہونے والی ڈیم کرسٹین ریان کا کوئی جانشین نہیں مل جاتا۔
آفسٹڈ کے چیف انسپکٹر مارٹن اولیور نے ان کی تقرری کا اعلان کرتے ہوئے کہا کہ مجھے بہت خوشی ہے کہ سر حامد عبوری چیئرمین کے طور پر خدمات انجام دیں گے، جبکہ حکومت ڈیم کرسٹین کے جانشین بھرتی کے لیے کوشاں ہے۔ میں ان کے ساتھ کام کرنے کے لیے پرجوش ہوں۔
واضح رہے کہ مفتی حامد پٹیل اس منصب پر مقرر ہونے والے پہلے مسلمان ہیں۔
مفتی حامد پٹیل کون ہیں؟
مفتی حامد پٹیل کی تقرری پر کس کو اعتراض ہے اور کیوں؟
مفتی حامد پٹیل کی آفسٹڈ چیئرمین کے طور پر تقرری سے برطانیہ کے علاوہ بھارت کے دائیں بازو کے کارکنان بھی کافی بھڑکے ہوئے ہیں۔ سوشل میڈیا پلیٹ فارم ایکس پر ان کی اس تقرری کے خلاف ٹرینڈ تک چلایا گیا اور مختلف اکاؤنٹ سے مفتی پٹیل کے خلاف قابل اعتراض ٹویٹ کیے گئے۔ راجیش سناتنی نام کے ایک اکاؤنٹ ہولڈر نے لکھا کہ ‘وہ اب سکھائیں گے کہ زمین چپٹی ہے۔۔۔ کسی انگریز کو 72 حور نہیں ملے گی اور وہ دوزخ میں جلائے جائیں گے۔” میجر نمرتا دھسمانا نام کے ایک اور اکاؤنٹ سے لکھا گیا کہ ”برطانیہ اب کاروبار سے لے کر تعلیم تک ہر چیز میں ختم ہوچکا ہے۔ اب اس سے تعاون کرنے کے لیے کچھ نہیں بچا ہے۔”
وہیں مارک وٹفورڈ نام کے ایک برطانوی نے ٹویٹ کیا کہ ”کیا یہ ہمارے ملک کے اسلامائزیشن کی ایک اور مثال ہے؟ اسرائیل پر 7 اکتوبر 2023 کو حماس کے حملے کے بارے میں حامد پٹیل کی رائے جاننا انتہائی دلچسپ ہوگا۔” @crescendo2001 نام کے ایک اکاؤنٹ ہولڈر نے ٹویٹ کیا کہ مغربی تعلیمی معیار کا حال یہ ہے کہ ”اب عظیم برطانیہ کے تعلیمی شعبے کی قیادت مفتی حامد پٹیل کریں گے۔ یہ دہشت گردوں کی دراندازی ہے، وہ شرعیہ اور مدارس کے ذریعہ برطانوی بچوں کی تعلیم کو یرغمال بنا رہے ہیں۔” ایک اور اکاؤنٹ @Eagleeye47 سے ٹویٹ کیا گیا کہ ”اب برطانیہ کے پاس بھی غزہ جیسا تعلیمی نظام ہوگا۔” وہیں ‘ایکس مسلم’ نام کے ایک اکاؤنٹ ہولڈر نے ٹویٹ کیا کہ ”انگریزوں نے 400 سال تک دنیا کو کالونی بنایا، اب وہ اسلام کی کالونی بن گئے ہیں۔”
مفتی حامد پٹیل کی تقرری کا خیرمقدم
دوسری طرف مسلم کونسل آف برطانیہ نے حامد مفتی حامد پٹیل کی آفسٹڈ کے عبوری چیئرمین کے طور پر تقرری کو ‘تاریخی’ قرار دیتے ہوئے خیر مقدم کیا ہے۔
مسلم کونسل نے اپنے بیان میں لکھا کہ ان کا ادارہ آج مفتی حامد پٹیل کی آفسٹڈ کے عبوری چیئرمین کے طور پر تقرری کا خیرمقدم کرتا ہے، جو اس عہدے پر مقرر ہونے والے پہلے برطانوی مسلمان ہیں۔
اسی کے ساتھ برطانوی مسلم کونسل نے ان کی تقرری پر کیے گئے اسلامو فوبک حملوں کی بھی شدید مذمت کرتے ہوئے کہا کہ یہ لوگ ان کی پیشہ ورانہ صلاحیتوں کے بجائے ان کی مسلم شناخت سے متاثر دکھائی دیتے ہیں۔
آفسٹڈ کیا ہے؟
آفسٹڈ (Ofsted) کا فل فارم آفس فار اسٹینڈرڈز ان ایجوکیشن، چلڈرن سروسز اینڈ اسکلز ہوتا ہے۔ یہ برطانیہ کا تعلیم اور تربیت کے لیے قومی ریگولیٹری ادارہ ہے جو تمام عمر کے سیکھنے والوں بشمول اسکول، بچوں کی دیکھ بھال اور تربیت فراہم کرنے والی خدمات اور اداروں کے معائنہ اور ریگولیشن کا کام کرتا ہے۔
