کیا آپ جانتے ہیں کہ فلم چکر کیلئے نیلم منیر اور احسن خان پہلا انتخاب نہیں تھے؟

کراچی: شوبزانڈسٹری میں کورونا پابندیوں کے بعد سینیما گھروں میں دو سال کے بعد فلموں کی نمائش شروع ہوئی ہے، سینیما گھروں میں کئی پاکستانی فلمیں ریلیز ہوئی ہیں جن میں چکر بھی شامل ہے۔

یاسر نواز کی دیگر فلموں کے برعکس جو زیادہ تر کامیڈی پر مبنی ہیں،(چکر)ایک کرائم تھرلر فلم ہے جس میں نیلم منیر دوہرے کردار میں نظر آئیں، فلم میں نیلم منیر کے ہمراہ اداکار احسن خان بھی مرکزی کردار ادا کررہے ہیں۔

حال ہی میں ندایاسر اور یاسرنواز ایک انٹرویو میں نظر آئے جہاں پر اُن سے فلم کے حوالے سے متعدد سوالات پوچھے گئے، اس دوران ایک سوال کے جواب میں ندا یاسر نے کہا کہ نیلم منیر اور احسن خان فلم کیلئے پہلا انتخاب نہیں تھے۔

یہ بھی پڑھیں: نئی پاکستانی فلم کا پوسٹربالی ووڈ پوسٹرکی نقالی نکلا، سوشل میڈیا صارفین کی تنقید

انٹرویو کرنے والے نے اُن سے پوچھا تو پھر کون تھا انتخاب تو انہوں نے کہا کہ فلم کے مرکزی کردار کیلئے ماورہ حسین اور فیروز خان کا انتخاب کیا گیا تھا اور اُن سے بات بھی کرلی گئی تھی لیکن کچھ وجوہات کی بناء پر بات آگے نہیں بڑھ سکی۔

مزید برآں ندا یاسر نے کہا کہ جو ہوتا ہے وہ اچھے کیلئے ہی ہوتا ہے اور وہ فلم کے موجودہ اداکاروں کے کام سے بہت زیادہ خوش اور مطمئن ہیں۔