مشکل وقت میں غریبوں کو تنہاء نہیں چھوڑیں گے، شاہد آفریدی

کراچی:قومی کرکٹ ٹیم کے سابق کپتان اور آل راؤنڈر شاہد آفریدی نے کہا ہے کہ وہ اور ان کی ٹیم اس مشکل وقت میں غریبوں کے ساتھ کھڑے ہیں،انہوں نے کہا کہ موجودہ صورتحال میں غریبوں کو تنہاء نہیں چھوڑیں گے۔

انسٹاگرام پر سابق کپتان شاہد آفریدی نے کچھ تصاویر شیئر کی ہیں اور ساتھ ہی کیپشن میں لکھا کہ شاہد آفریدی فاؤنڈیشن‘ اور ’ڈونیٹ کرو نا‘کی ٹیم کے افراد ٹھیلے والوں، یومیہ اْجرت پر کام کرنے والے اور چھوٹا کاروبار کرنے والے افراد کو اس مشکل وقت میں راشن تقسیم کررہے ہیں۔

انہوں نے لکھا کہ وہ اس صورتحال میں وہ ایسے ہی غریب لوگوں کی مدد کرتے رہیں گے۔ شاہد آفریدی نے آخر میں لکھا کہ اْن کو مزید سپورٹ کرنے کے لیے www.donatekarona.com پر رابطہ کریں۔

واضح رہے کہ شاہد آفریدی خود بھی کورونا کا شکار ہوچکے ہیں، 13جون کوانہوں نے سماجی رابطے کی ویب سائٹ ٹوئٹر پر اپنے ایک پیغام میں بتایا تھا کہ جمعرات سے میری طبیعت ناساز ہے اور میرے جسم میں بھی شدید درد ہو رہا تھا جس کے بعد میں نے اپنا کورونا ٹیسٹ کروایا۔

https://www.instagram.com/p/CB-5JWmlMyz/

سابق کپتان نے لکھا کہ ’بدقسمتی سے میرے کورونا ٹیسٹ کے نتائج مثبت آگئے ہیں۔جبکہ شاہد خان آفریدی نے اپنے فینز کے لیے سوشل میڈیا پر لائیو بیان بھی جاری کیا تھا،جس میں انہوں نے کہا تھا کہ کورونا وائرس کے لاحق ہونے کے بعد شروع کے دو تین روز مشکل تھے، لیکن اب کافی بہتر ہوں۔