گوگل نیوز پر ہمیں فالو کریںکراچی: وفاقی اردو یونیورسٹی کے وائس چانسلر ڈاکٹرمحمد ضیاالدین کو اختیارات کا ناجائز استعما ل کرنے پر عہدے سے ہٹادیا گیا اور اس سلسلے میں نو ٹیفکیشن بھی جاری کردیا ہے۔
ذرائع کے مطابق ڈاکٹر محمد ضیا الدین کے خلاف فیکٹ فائنڈنگ انکوائری کمیٹی کی تشکیل دیدی گئی، وزارت وفاقی تعلیم اور پیشہ ورانہ تربیت نے باقاعدہ نوٹی فکیشن جاری کردیا۔
نوٹیفکیشن کے متن میں کہا گیا ہے کہ پروفیسر ڈاکٹر محمد ضیاء الدین، قائم مقام وائس چانسلر، فیڈرل اردو یونیورسٹی نے ایسے فیصلے کیے جو غیر قانونی ہیں،کمیٹی ایمرجنسی بنیادوں پر سفارشات مرتب کرے گی۔
نوٹیفکیشن میں کہا گیا ہے کہ ڈاکٹر ضیاالدین اب سے کسی قسم کے انتظامی اور مالی اختیارات کا استعمال نہ کریں، سینیٹ کی منظوری کے مطابق ان کی مدت ملازمت ختم ہو چکی ہے۔
گزشتہ دو سالوں کی مبینہ انتظامی اور مالی بے ضابطگیوں کی تحقیقات کے لیے کمیٹی قائم کردی گئی ہے، کمیٹی ذمہ داری کا تعین کرنے کے لیے سفارشات دے گی۔
انکوائری کمیٹی کا سربراہ سینئر جوائنٹ سیکرٹری ایچ ای عبدالستار کھوکھرکو مقرر کردیا گیا ہے، دیگر ممبران میں ناصر شاہ، ڈائریکٹر جنرل، اور بریگیڈیئر سید علی حیدر کاظمی، ریجنل ڈائریکٹر، نمل کراچی کیمپس شامل ہونگے۔
