امریکی صدر ڈونلڈ ٹرمپ گزشتہ ہفتے مغربی تہوار تھینکس گیونگ کے موقع پر اچانک افغانستان پہنچے جہاں انہوں نے امید ظاہر کی کہ امریکا کی طویل جنگ کے خاتمے کے لیے طالبان جنگ بندی پر رضامند ہوجائیں گے اس حوالے سے امریکی حکام کا کہنا ہے کہ افغان امن عمل کیلئے امریکا کے نمائندہ خصوصی زلمے خلیل زاد جلد طالبان سے مذاکرات کی بحالی اور جنگ بندی کی کوشش کریں گے۔
امریکی صدر ڈونلڈ ٹرمپ کے دورہ افغانستان کے چند روز بعد زلمے خلیل زاد، افغان صدر اشرف غنی سے ملاقات کے لیے کابل پہنچے اور مذاکرات کی بحالی کی نوید سنادی ہے۔کابل میں ملاقاتوں کے بعد زلمے خلیل زاد طالبان سے ملاقات کے لیے قطر رروانہ ہوں گے۔
امریکی نمائندہ خصوصی زلمے خلیل زاد مذاکرات اور جنگ کے پُرامن حل سے متعلق اقدامات پر تبادلہ خیال کے لیے طالبان سے دوبارہ مذاکرات کریں گے‘۔
یاد رہے کہ رواں سال ستمبر کو صدر ٹرمپ نے طالبان کے ایک حملے میں ایک امریکی فوجی کی ہلاکت پر مذاکرات منسوخ کردیے تھے جس پر طالبان نے صدر ٹرمپ کومذاکرات کا سلسلہ معطل کرنے پر ’پہلے سے زیادہ سخت نتائج‘ کی دھمکی دی تھی۔
امریکا کے ساتھ مذاکرات منسوخ ہونے کے بعد طالبان کے وفد نے روس کا دورہ کیااس دورے کا مقصد امریکا کے ساتھ مذاکرات بحالی کی کوشش نہیں بلکہ امریکا کو افغانستان سے انخلا پر مجبور کرنے کے لیے علاقائی حمایت کا جائزہ لینا تھابعد ازاں طالبان کےوفد نے 29 ستمبر کو بیجنگ کا دورہ کیا تھا اور چینی نمائندہ خصوصی سے ملاقات کی تھی۔
یاد رہے کہ ستمبر میں امریکا اور طالبان افغانستان میں قیام امن کے حوالے سے معاہدے کے بظاہر بالکل قریب آ چکے تھے تاہم کابل میں ہونیوالے ایک حملے کے بعد یہ معاملہ کھٹائی میں پڑ گیا ہے۔
اگر یہ معاہدہ ہوجاتا تو ممکنہ طور پر امریکا، افغانستان سے اپنے فوجیوں کو بتدریج واپس بلانے کا لائحہ عمل طے کرتا اورطالبان کی جانب سے یہ ضمانت مل جاتی کہ افغانستان مستقبل میں کسی دوسرے عسکریت پسند گروہوں کے لیے محفوظ پناہ گاہ نہیں ہوگا۔
صدر ٹرمپ ایک بار پھر مذاکرات کی بحالی کا عندیہ دے چکے ہیں ، ان کا کہنا ہے کہ ہم طالبان سے ایک معاہدے پر اتفاق رائے پیدا کرنے پر کام کر رہے ہیںاورافغانستان سے امریکی فوجیوں کا انخلاء بھی شروع کیا جائے گا۔
امریکی صدر ٹرمپ کے خیالات میں تبدیلی طالبان کی جانب سے 3 رہنماؤں کی رہائی کے بدلے مغوی امریکی پروفیسر کو آزاد کرنے کے بعد آئی اور امریکی پروفیسر کی رہائی کے دوران ہونے والے مذاکرات کے درمیان ہی فریقین کے درمیان ایک بار پھر اعتماد کی فضا قائم ہوئی ہے۔
گوگل نیوز پر ہمیں فالو کریں
