پاکستان میں بھارتی میزائل گرنے کا معاملہ، امریکا کا تبصرے سے انکار

واشنگٹن: امریکا نے پاکستان میں بھارتی میزائل گرنے کے معاملے پر تبصرے سے انکار کردیا ہے، امریکی محکمۂ خارجہ کا کہنا ہے کہ بھارت نے واقعے کو حادثہ قرار دیا تھا، مزید کچھ نہیں کہہ سکتے۔

تفصیلات کے مطابق امریکی محکمۂ خارجہ کے ترجمان نیڈ پرائس نے کہا کہ بھارت نے واقعے کو حادثہ قرار دیا ہے۔ اس سے زیادہ کچھ نہیں کہہ سکتا۔ بھارت میں یورینیم چوری کے واقعے سے بھی لاعلمی کا اظہار کردیا۔

یہ بھی پڑھیں:

دفتر خارجہ نے بھارتی میزائل کے پاکستان میں داخلے پر سوالات اٹھا دئیے

خیال رہے کہ اس سے قبل پاکستان نے بھارتی میزائل کے پاکستان میں بلا اشتعال داخلے پر سوالات اٹھاتے ہوئے کہا کہ بھارت وضاحت کرے کہ میزائل پاکستان میں داخل کیسے ہوا؟ عدالتی تحقیقات کا فیصلہ کافی نہیں ہے۔

آج سے 2 روز قبل دفترِ خارجہ نے بھارت سے میزائل کے پاکستان میں داخلے پر مشترکہ تحقیقات کا مطالبہ کرتے ہوئے کہا کہ ہم نے بھارتی وزارتِ دفاع کے بیان کا نوٹس لیا ہے۔ اندرونی عدالتی تحقیقات کا فیصلہ افسوسناک ہے۔

ترجمان دفترِ خارجہ نے کہا کہ بھارتی حکام نے جو سادہ سی وضاحت پیش کی، وہ کافی نہیں، بھارت کچھ سوالات کے جوابات دے۔ حادثاتی میزائل فائرنگ اور روکنے کے طریقہ کار کی وضاحت کی جائے، میزائل کی قسم اور خصوصیات واضح طور پر بیان ہونی چاہئیں۔