متحدہ عرب امارات کا 2026 میں ڈیجیٹل کرنسی متعارف کرانے کا اعلان

ابوظہبی :متحدہ عرب امارات کے مرکزی بینک نے 2026 میں ملک کی پہلی ڈیجیٹل کرنسی متعارف کرانے کا اعلان کیا ہے۔

میڈیارپورٹس کے مطابق یواے ای کے مرکزی بینک نے ایک بیان میں کہا کہ وہ ڈیجیٹل کرنسی متعارف کرانے کے علاوہ ملک میں مالیاتی خدمات کے شعبے کوڈیجیٹل بنانے کے لیے بھی اقدامات کرے گا اور اس سلسلے میں مصنوعی ذہانت اور بِگ ڈیٹا سالوشنز کو بروئے کارلائے گا۔

یواے ای کے سرکاری میڈیا کے بیان کے مطابق مرکزی بینک کا یہ اعلان اس کے 2023سے 2026 تک کے منصوبے کا حصہ ہے۔اس کے تحت وہ خود کو دنیا کے دس سرفہرست مرکزی بینکوں میں شمارکرنا چاہتا ہے۔

مزید پڑھیں: بل گیٹس نے ڈیجیٹل کرنسی سے جان چھڑانے کا مشورہ دے دیا

واضح رہے کہ 2019 میں سعودی عرب اور متحدہ عرب امارات نے سرحدپار ترسیلات زر کے لیے اپنی مشترکہ کرپٹوکرنسی کے آزمائشی مرحلے کا اعلان کیا تھا۔اس وقت کوروناوائرس کی وبا کے تناظر میں دنیا بھر میں کرپٹوکرنسی بِٹ کوائن کی مقبولیت میں اضافہ ہورہا ہے۔

اس کے علاوہ آن لائن رقوم کی ادائی اور منتقلی کے رجحان کوتقویت ملی ہے،اس کے پیش نظر دنیا کے مرکزی بینک خود اپنے اپنے متبادل حل کی تلاش میں ہیں۔

چین نے مارچ میں کرپٹوکرنسیوں کی اس دوڑ میں شریک ہونے کا اعلان کیا تھا۔اس نے ڈیجیٹل یوآن کو متعارف کرایاتھا اور اس کے آزمائشی مرحلے کا آغاز کیا تھا۔