گوگل نیوز پر ہمیں فالو کریںلاڑکانہ: پاکستان پیپلز پارٹی کے دو کارکن ذوالفقار علی بھٹو کی برسی کی تقریب سے واپسی پر ایک المناک ٹریفک حادثے میں جاں بحق ہو گئے۔
یہ حادثہ اس وقت پیش آیا جب وہ ذوالفقار علی بھٹو کی برسی میں شرکت کے بعد لاڑکانہ سے واپس جارہے تھے۔ حادثہ میں وین الٹنے سے متعدد افراد زخمی بھی ہوئے، جنہیں فوری طور پر طبی امداد کے لیے لارکانہ کے ٹراما سینٹر منتقل کر دیا گیا۔
ریسکیو حکام کے مطابق حادثے میں ڈرائیور سمیت سات افراد زخمی ہوئے، جبکہ دو کارکنان، عرفان اور زین العابدین، زخموں کی تاب نہ لاتے ہوئے جاں بحق ہو گئے۔ وین میں سوار تمام افراد پیپلز پارٹی کے کارکن تھے، جو ذوالفقار علی بھٹو کی برسی کی سالانہ تقریب سے واپس جارہے تھے۔
حادثے کے بعد پیپلز پارٹی کے رہنما، جن میں رکنِ صوبائی اسمبلی جمیل سومرو اور لارکانہ کے میئر شامل تھے، ٹراما سینٹر پہنچے، جہاں انہوں نے زخمیوں کی عیادت کی اور جاں بحق کارکنوں کے اہلِ خانہ سے ہمدردی اور تعزیت کا اظہار کیا۔
پیپلز پارٹی کے چیئرمین بلاول بھٹو زرداری نے بھی اس سانحے پر گہرے دکھ اور افسوس کا اظہار کیا اور جاں بحق کارکنوں کو خراجِ عقیدت پیش کیا۔
