پی ٹی آئی کے 20 ناراض ارکان پنجاب اسمبلی کا الگ گروپ تشکیل

لاہور: پاکستان تحریک انصاف کے جنوبی پنجاب کے مختلف حلقوں سے تعلق رکھنے والے 20 ارکان پنجاب اسمبلی نے مسائل حل کرانے کے لیے ایک الگ گروپ تشکیل دے دیا۔

پاکستان تحریک انصاف کے جنوبی پنجاب سے تعلق رکھنے والے 20 ناراض ارکان صوبائی اسمبلی نے الگ گروپ بنایاہے جنہوں نے حلف اٹھایا ہے کہ ایک دوسرے کے ساتھ رہیں گے اور مل کر مطالبات منوائیں گے۔

گروپ نے وزیراعلیٰ پنجاب عثمان بزدار سے حلقوں کے لیے فنڈز اورعوامی منصوبوں کامطالبہ کیا،لیہ سے پنجاب اسمبلی کے رکن سردار شہاب الدین نے بتایا کہ گروپ میں ان کے علاوہ ملک غضنفر چھینہ، تیمور لالی شامل ہیں ۔

اس کے علاوہ مامون تارڑ، فیصل فاروق چیمہ، اعجاز خان،گلریز افضل چن ،کرنل غضنفر عباس، خواجہ داؤد بندیشہ، محی الدین کھوسہ اور عامر عنایت شہوانی سمیت دیگر ارکان گروپ میں شامل ہیں۔

تحریک انصاف کے سینیئر رہنما سردار شہاب کا کہنا ہے کہ گروپ نے وزیراعلیٰ عثمان بزدار سے اپنے حلقوں کے لیے فنڈز کے اجراء اور عوامی منصوبے شروع کرنے کا مطالبہ کیاہے۔

یہ بھی پڑھیں: وزیر اعظم عمران خان کی چھوٹے دکانداروں پر غیر ضروری ٹیکسز ختم کرنے کی ہدایت

ان کا کہنا تھا کہ گروپ و جلد وزیراعلیٰ پنجاب عثمان بزدار اور پی ٹی آئی کی اعلیٰ قیادت سے رابطہ کرے گا اور مسائل کی نشاندہی سمیت اپنے حلقوں میں ترقیاتی کاموں کے لیے بھرپور کردار ادا کرے گا۔

سردار شہاب کا کہنا تھا کہ گروپ کسی تبدیلی کے لیے نہیں بنایا گیا بلکہ ان اراکین کو صرف اپنے مسائل کے حل میں دلچسپی ہے، وہ تحریک انصاف کے ساتھ ہیں اورساتھ رہیں گے،جبکہ تحریک انصاف کے پلیٹ فارم سے ہی آئندہ الیکشن بھی لڑیں گے۔

واضح رہے کہ اس سے قبل حکومت کی اتحادی جماعتوں مسلم لیگ ق، ایم کیو ایم اور گرینڈ مسلم الائنس بھی اپنے مسائل حل نہ ہونے پر اپنے تحفظات کا اظہارکرچکی ہیں۔