کراچی میں کار سوار نے ٹریفک پولیس پر گاڑی چڑھا دی، اہلکار زخمی

کراچی میں ٹریفک پولیس کا اپنے فرائض سرانجام دینا جرم بن گیا، کار سوار نے قانون کی خلاف ورزی سے روکنے پر اہلکار پر گاڑی چڑھا دی جس کے نتیجے میں اہلکار زخمی ہوگیا ہے۔

تفصیلات کے مطابق کراچی کے علاقے نمائش چورنگی پر کار نے پولیس اہلکار کو ٹکر مار دی۔ ٹریفک پولیس کے اہلکار نے گاڑی روکنے کی کوشش کی تھی۔

یہ بھی پڑھیں:

کراچی ریلیوں کی زد میں آگیا، شہر میں بد ترین ٹریفک جام، شہری پریشان

ڈی آئی جی ٹریفک کا عام شہری کے بھیس میں شاہراہ فیصل کا دورہ، 5اہلکار معطل

قانون کی خلاف ورزی سے روکنے پر کار سوار شہری مشتعل ہوگیا جس نے اپنی گاڑی روکنے کی بجائے پولیس اہلکار پر چڑھا دی۔ زخمی اہلکار کو طبی امداد کیلئے ہسپتال منتقل کردیا گیا ہے۔

خیال رہے کہ اس سے قبل شہر قائد میں شاہراہ فیصل پر ڈیوٹی چھوڑ کر ایک جگہ بیٹھ کر گپ شپ کرنے والے 5 پولیس اہلکاروں کو ڈی آئی جی ٹریفک احمد یار چوہان نے معطل کر دیا۔

ذرائع کے مطابق عام شہری کے بھیس میں دورے کے دوران ڈی آئی جی ٹریفک احمدیار چوہان کو پولیس اہلکاروں نے ترکی بہ ترکی جواب دیئے۔

ڈی آئی جی ٹریفک احمد یار چوہان پرائیویٹ کار میں شہر میں گھوم پھر رہے تھے کہ شارع فیصل پر ایئرپورٹ کے اسٹار گیٹ سگنل پر ڈیوٹی چھوڑ کر ایک جگہ جمع پولیس اہلکاروں کے پاس جا پہنچے۔

سڑک کے کنارے کھڑے ہو کر ڈی آئی جی ٹریفک توجہ سے اہلکاروں کی گفتگو سننے لگے، اہلکار ٹریفک کنٹرول کرنے کے بجائے خوش گپیوں میں مصروف تھے۔