اب سیاحتی ویزا رکھنے والے بھی عمرہ ادا کر سکیں گے

سعودی عرب کی جانب سے عمرہ پالیسی میں بڑی تبدیلی سامنے آئی ہے، سعودی حکومت نے سیاحتی ویزا رکھنے والوں کو بھی عمرے کی ادائی کی اجازت دے دی۔

عرب میڈیا کے مطابق سعودی وزارت حج نے سیاحتی ویزے پر ملک آنے والے افراد کو عمرے کی ادائی کی اجازت دینے کا اعلان کیا۔

عرب میڈیا کے مطابق سیاحتی ویزے کے لیے درخواست دینے کے اہل 49 ممالک کے شہری اس سہولت سے فائدہ اٹھاسکیں گے جبکہ ای ویزا کے اہل افراد سعودی عرب آمد پر ائیرپورٹ سے ہی سیاحتی ویزا حاصل کرسکیں گے۔

سعودی وزارت حج نے کہا کہ امریکا، برطانیہ اوریورپی ویزا رکھنے والے افراد بھی سعودی عرب کے دورے کے دوران عمرے کی ادائی کرسکیں گے جب کہ فیملی وزٹ ویزا رکھنے والے افراد بھی ایپلی کیشن کے ذریعے درخواست دے کر عمرہ ادا کرسکتے ہیں۔

واضح رہےکہ کورونا وائرس کی وبا کے آغاز کے بعد سے حال ہی میں سعودی حکام نے خانہ کعبہ کے گرد لگے بیرئیرز کو ہٹادیا ہے جس کے بعد زائرین کو اب حجرِ اسود کو بوسہ دینے کی اجازت دی گئی ہے۔

سعودی حکام نے یہ بیرئیرز کورونا وائرس کی روک تھام کے سلسلے میں لگائے تھے۔