ٹک ٹاک ایچ بی ایل پی ایس ایل 7 اور 8 کا شراکت دار بن گیا

لاہور: ٹک ٹاک ایچ بی ایل پی ایس ایل 7 اور 8 کا شراکت دار بن گیا، ایونٹ کے آن لائن ٹکٹ cricket.bookme.pk اور ایم اینڈ پی استورز سے خریدے جاسکتے ہیں۔

تفصیلات کے مطابق مختصر دورانیے کی ویڈیوز بنانے اور شیئر کرنے والے عالمی پلیٹ فارم، ٹک ٹاک ایچ بی ایل پاکستان سپر لیگ کے ساتویں اور آٹھویں ایڈیشن کا آفیشل انٹرٹینمنٹ پارٹنر بن گیا ہے۔اس شراکت داری کے تحت آئندہ دو ایڈیشنز تک ایچ بی ایل پی ایس ایل کے مداح ٹک ٹاک کے ذریعے ایسا مواد تیار کرسکیں گے جسے دنیا بھر میں دیکھاجاسکے گا۔

یہ بھی پڑھیں:

کپتان پیٹ کمنز نے عثمان خواجہ کیلئے ایشز سیریز کا جشن رکوادیا

27 جنوری سے شروع ہونے والی ایچ بی ایل پی ایس ایل 7 کا پہلا مرحلہ نیشنل اسٹیڈیم کراچی میں جبکہ دوسرا مرحلہ 10 سے 27 فروری تک قذافی اسٹیڈیم لاہور میں کھیلا جائے گا۔ایونٹ میں مجموعی طور پر 34 میچز کھیلے جائیں گے۔ٹک ٹاک اور ایچ بی ایل پی ایس ایل کے مابین انٹرٹینمنٹ کی بنیاد پر شراکت داری کا 2 سالہ معاہدہ ہوا ہے۔ 

دو سالہ شراکت داری کے اس معاہدے کے تحت ایچ بی ایل پی ایس ایل ٹک ٹاک کے ساتھ مل کر کنٹنٹ تیار کرے گا اورکرکٹ فینزہیش ٹیگ #KhelegaPakistan کا استعمال کرتے ہوئے پلیٹ فارم پر ٹورنامنٹ کے ناقابل فراموش لمحات کو ایک ساتھ منائیں گے، جسے دنیا بھر میں موجود ایک ارب سے زائد صارفین دیکھ سکیں گے۔

ویڈیو شیئرنگ پلیٹ فارم ٹک ٹاک کے ذریعے پی سی بی کا پاکستان سمیت دنیا بھر میں موجود اپنے مداحوں سے تعلق مزید مضبوط ہوگا۔کرکٹ کے شائقین اس ایپ پر میچ سے قبل اور بعد کے لمحات کے علاوہ میچ کی جھلکیاں بھی ملاحظہ کرسکیں گے۔ ٹک ٹاک نے ایچ بی ایل پی ایس ایل کے چھٹے ایڈیشن میں بھی پی سی بی سے شراکت داری کا کامیاب معاہدہ کیا تھا۔ 

چیئرمین پی سی بی رمیز راجہ کا کہنا ہے کہ انہیں ٹک ٹاک کے ایچ بی ایل پاکستان سپر لیگ 7 او ر8 کے آفیشل انٹرٹینمنٹ پارٹنر بننے پر خوشی ہے۔ ٹک ٹاک جیسے پلیٹ فارم نے سوشل میڈیا پر مواد کی تخلیق میں انقلاب برپا کیا ہے۔ایچ بی ایل پاکستان سپر لیگ شائقینِ کرکٹ کو معیاری کرکٹ کے ساتھ ساتھ بھرپور تفریح بھی فراہم کرتی ہے۔

پاکستان، مشرقِ وسطیٰ، ترکی اور افریقہ میں ٹک ٹاک کے ہیڈ آف برانڈ مارکیٹنگ پاؤل کاترب کا کہنا ہے کہ انہیں ایچ بی ایل پی ایس ایل کے آئندہ دو ایڈیشنز کے لیے آفیشل انٹرٹینمنٹ پارٹنر بننے پر خوشی ہے۔ٹک ٹاک آن لائن انڈستری کا ایک بڑا میدان ہے جہاں صارفین ویڈیو مواد تیار کرکے کھیلتے ہیں۔ پاکستانی شائقین کیلئے فیچرز اور فلٹرز بھی متعارف کرائے جائیں گے۔