پرامن لوگوں پر حملہ گھناؤنا عمل ہے، اقوام متحدہ کی پاکستان میں دہشتگرد حملے کی مذمت

واشنگٹن: اقوام متحدہ کے سیکریٹری جنرل انتونیو گوتریس نے پاکستان میں گزشتہ روز ہونے والے دہشتگرد حملوں کی مذمت کی ہے۔

سماجی رابطے کی ویب سائٹ پر اپنے مذمت بیان میں اقوام متحدہ کے سیکریٹری جنرل نے کہا ہے کہ میں جمعہ کو پاکستان میں ہونے والے دہشت گردانہ حملوں کی مذمت کرتا ہوں۔

I condemn the terrorist attacks that took place in Pakistan this Friday.

It is abhorrent that these attacks targeted people during peaceful, religious ceremonies.

Those responsible must be held to account.

— António Guterres (@antonioguterres) September 29, 2023

انتونیو گوتریس نے مزید کہا کہ دہشتگرد حملوں میں پرامن، مذہبی تقریبات کے دوران لوگوں کو نشانہ بنایا گیا جو کہ ایک گھناؤنا عمل ہے، حملوں کے ذمہ داروں کا محاسبہ ہونا چاہیے۔

یہ بھی پڑھیں:

مستونگ خود کش حملے کی ویڈیو سامنے آگئی

علاوہ ازیں امریکا کی جانب سے بھی بلوچستان اور خیبرپختونخوا میں ہونے والے خودکش حملوں میں قیمتی جانوں کے ضیاع کی مذمت کی گئی ہے۔

سماجی رابطے کی ویب سائٹ پر جاری کیے گئے اپنے مذمتی بیان میں امریکی محکمہ خارجہ کے ترجمان نے کہا کہ امریکا بلوچستان اور خیبرپختونخوا میں ہونے والے خودکش حملوں کی مذمت کرتا ہے جن میں نمازیوں سمیت دیگر افراد ہلاک اور زخمی ہوئے۔

امریکی محکمہ خارجہ کے ترجمان میتھیو ملر نے اپنے ٹوئٹ میں مزید کہا ہے کہ پاکستانی بلا خوف و خطر اپنے عقیدے پر عمل کرنے کے مستحق ہیں، ہم ان خاندانوں کے ساتھ گہری تعزیت کرتے ہیں جنہوں نے اپنے پیاروں کو کھو دیا ہے۔