حکومت اور فوج علیحدہ نہیں، دونوں کے تعلقات مثالی ہیں، فواد چوہدری

وفاقی وزیر اطلاعات فواد چوہدری نے کہا ہے کہ حکومت اور فوج علیحدہ نہیں ہے، وزیراعظم اور چیف آف آرمی اسٹاف کے تعلقات مثالی ہیں۔

سماجی رابطے کی ویب سائٹ ٹوئٹر پر جاری پیغام میں فواد چوہدری نے کہا کہ مسلسل ایک مہم چلائی جا رہی ہے کہ حکومت اور فوج کو علیحدہ دکھایا جائے، کسی بھی صورت میں ان تعلقات پر آنچ نہیں آئے گی۔

مسلسل ایک کمپین چلائ جا رہی ہے کہ حکومت اور فوج کو علیحدہ دکھایا جائے، عمران خان واضع کر چکے ہیں افواج پاکستان پاکستان کی سلامتی اور تحفظ کی علامت ہیں چیف آف آرمی اسٹاف اور وزیر اعظم کے تعلقات مثالی ہیں اور کسی بھی صورت میں ان تعلقات پر آنچ نہیں آئے گی

— Ch Fawad Hussain (@fawadchaudhry) April 1, 2022

ان کا کہنا تھا کہ عمران خان واضع کر چکے ہیں افواج پاکستان ملک کی سلامتی اور تحفظ کی علامت ہے۔

یاد رہے کہ آج ایک انٹرویو میں وزیراعظم عمران خان نے کہا تھا کہ میں کبھی ایسا کام نہیں کروں گا جس سے فوج کمزور ہو، نوازشریف پاکستان کے بھی دشمن ہیں اور فوج کے بھی، آرمی چیف کو ڈی نوٹیفائی کرنے کی بات ن لیگ کی ڈس انفارمیشن مہم تھی، آرمی سے تعلقات اچھے ہیں، یہ فوج کو پنجاب پولیس بنانا چاہتے ہیں۔

مزید برآں ایک سوال کے جواب میں وزیراعظم نے کہا تھا کہ ملک کو جتنا نقصان نواز شریف اور زرداری نے پہنچایا ہے کسی نے نہیں پہنچایا، دونوں نے مل کر پاکستان کو تباہ کیا بعدازاں انہوں نے کہا کہ یہ دونوں اگر اقتدار میں آگئے تو سب سے پہلے نیب کو ختم کریں گے۔

ان کا کہنا تھا کہ میری جان کو خطرہ لاحق ہے لیکن حکومت کیا چیز ہے اگر جان بھی چلی جائے تو انہیں این آر او نہیں دوں گا۔