طالبان نے قبضے کے بعد افغانستان کے پہلے ٹیسٹ میچ کی منظوری دیدی

کابل : طالبان نے قبضے کے بعد افغانستان کے پہلے ٹیسٹ میچ کی منظوری دیتے ہوئے امید ظاہر کی ہے کہ نئے اصول کے تحت بین الاقوامی میچ معمول کے مطابق جاری رہیں گے۔

افغانستان کرکٹ بورڈ کے چیف ایگزیکٹو حامد شنواری کاکہنا ہے کہ ہمیں ٹیم کو آسٹریلیا بھیجنے کی منظوری مل گئی ہے۔

واضح رہے کہ اپنے سابقہ دور اقتدار میں 2001میں طالبان نے کھیلوں سمیت تفریح کی کئی اقسام پر پابندی عائد کر دی تھی۔موجودہ طالبان قیادت کا کہنا ہے کہ کرکٹ پر کوئی اعتراض نہیں ہے اور یہ کھیل بہت سے جنگجوؤں میں مقبول ہے۔

مزید پڑھیں:پنج شیر—-قضیہ کیا ہے؟—-انجام کیا ہوگا؟

واضح رہے کہ ہوبارٹ میں 27 نومبر سے یکم دسمبر تک کھیلا جانے والا ٹیسٹ میچ پچھلے سال شیڈول تھا لیکن یہ میچ کورونااور بین الاقوامی سفری پابندیوں کی وجہ سے ملتوی کردیا گیا۔ یہ آسٹریلیا میں افغانستان کا پہلا ٹیسٹ ہوگا۔

آسٹریلیا کے دورے سے قبل افغانستان کی ٹیم 17 اکتوبر سے 15 نومبر تک متحدہ عرب امارات میں ہونے والے ٹی ٹوئنٹی ورلڈ کپ میں شرکت کرے گی۔

افغان کرکٹ بورڈنے اس بات کی بھی تصدیق کی کہ افغانستان کی انڈر 19 کرکٹ ٹیم رواں ماہ کے آخر میں بنگلہ دیش کا دورہ کرے گی۔